Bandarískur maður gæti átt yfir höfði sér 15 ára fangelsi eftir að hann missti stjórn á skapi sínu í umferðinni. Stakk hann mann sem gaf ekki stefnuljós og hefur verið ákærður fyrir hættulega líkamsárás.
Tímaritið People greinir frá þessu.
Atvikið átti sér stað sunnan við borgina Milwaukee í Wisconsin fylki í Bandaríkjunum þann 23. apríl síðastliðinn. Var lögregla kölluð til um klukkan 19:00 að Ascension All Saints sjúkrahúsinu þar sem maður hafði verið stunginn í umferðinni.
Sjö sekúndur
Maðurinn hafði verið með kærustu sinni í bíl að keyra nálægt stað sem kallast North Beach þegar annar ökumaður svínar fyrir þau. Reyndist það vera maður að nafni Chad L. Norton, 28 ára að aldri.
Hafi Norton þessi verið mjög reiður, opnað gluggann og öskrað: „Kanntu ekki að nota helvítis stefnuljósið þitt?!?“
Var þessu alls ekki lokið með þessum dónaskap Norton og báðum ökumönnum var orðið heitt í hamsi. Lögðu þeir bílum sínum og Norton öskraði: „Ég ætla að berja þig í klessu!“ Skipaði hann brotaþola, sem hefur ekki verið nafngreindur, að koma út úr bíl sínum og mættust þeir á bílastæðinu augnliti til augnlitis.
Upphófust nú slagsmál sem að sögn brotaþolans stóðu yfir í ekki nema um 7 sekúndur. Sagðist hann sjálfur hafa kýlt frá sér í nokkur skipti. Fóru mennirnir svo sína leið.
Margir skurðir á brjósti og handlegg
Tók hann aldrei eftir neinum hníf og áttaði sig ekki á því að hann hafi verið stunginn fyrr en hann var kominn aftur inn í bílinn sinn. Voru sárin ekki svo djúp að hann gæti ekki keyrt sjálfur á sjúkrahúsið.
Á sjúkrahúsinu fékk hann aðhlynningu fyrir stungusárum sínum, sem voru þó nokkur, bæði á bringu og á handlegg. Þurfti að sauma saman sárin.
Lögreglan skoðaði myndbandsupptökur af slagsmálunum þar sem lítur út fyrir að Norton sé að gera stunguhreyfingar þó að hnífsblaðið sjálft sjáist ekki á upptökunni.
Bar við sjálfsvörn
Norton var svo handtekinn og ákærður fyrir hættulega líkamsárás. Játaði hann að hafa lenti í slagsmálum við brotaþola en sagðist til að byrja með ekki muna eftir að hafa brugðið kuta í þeirri rimmu. Hann sagðist þó yfirleitt ganga með samanbrjótanlegan hníf á sér og seinna viðurkenndi hann að hafa notað hnífinn, en þó aðeins til þess að reyna að bægja hnefahöggum brotaþolans frá sér. Hafi hann sveiflað hnífnum að höndunum á honum.
Norton mætti fyrir dómara í gær, miðvikudaginn 29. apríl, og neitaði sök í málinu. Málið heldur áfram þann 2. júní. Verði Norton fundinn sekur gæti hann átti yfir höfði sér allt að 15 ára fangelsi.
