Fjölmennt lið lögreglu stóð í aðgerðum í Kársnesi í Kópavogi upp úr hádegi í dag. Þar voru saman komnir bæði almennir lögreglumenn og liðsmenn sérsveitar ríkislögreglustjóra. Lögreglumenn sáust á ferli í görðum og virtust vera að leita að einhverju en ekki er vitað hverju.
Lögregla sást leiða einn mann út úr fjölbýlishúsi. Sá var handjárnaður.
Lögregla sendi minnst fjóra bíla almennu lögreglunnar í útkallið auk þess sem sérsveitin mætti með sex menn á þremur bílum.
Ekki hafa fengist upplýsingar um hvað varð til þess að lögregla fór á staðinn.
Lögreglan sendi frá sér fréttatilkynningu upp úr klukkan tvö. Þar kom fram að tilkynning hefði borist um alvarlegt atvik. Brugðist hefði verið hratt við og lögregla verið með mikinn viðbúnað í ljósi tilkynningarinnar. Ekki kemur fram hvers kyns tilkynningin var. Þar segir að rannsóknin sé á algjöru frumstigi og ekki unnt að veita frekari upplýsingar að svo stöddu.
Svæði við fjölbýlishús var girt af með lögregluborða.
Helena Rós Sturludóttir, upplýsingafulltrúi ríkislögreglustjóra, staðfesti í samtali við fréttastofu að sérsveitin hefði verið lögreglunni á höfuðborgarsvæðinu til aðstoðar.
Vísir greindi frá því í morgun að fjórir lögreglubílar hefðu verið kallaðir út á Laugaveg. Samkvæmt upplýsingum fréttastofu eru ekki tengsl þarna á milli.
Fréttin hefur verið uppfærð.
