Ströng inntökuskilyrði gilda um þá sem ætla sér að læra lögreglufræði. Bæði þarf að standast þrekpróf og skriflegt próf, ásamt því að standast bakgrunnsskoðun og læknisskoðun. Eitt af því sem er kannað er litasjón umsækjenda.
Þeir sem ætla sér að verða lögreglumenn þurfa að geta greint sjö rétt af hverjum tíu spjöldum á ishihara-litsjónprófi. Strangari reglur gilda síðan um þá sem ætla sér að verða flugmenn, skipstjórar eða flugumferðarstjórar.
Verða að geta greint liti til að bera kennsl á fólk og hluti
Ólafur Örn Bragason, forstöðumaður mennta- og starfsþróunarseturs lögreglunnar, segir að kröfurnar fyrir námið séu síbreytilegar og í stöðugri skoðun. Hins vegar sé mikilvægt að lögreglumenn geti greint liti.
Oftar en ekki komi fyrir að lýst sé eftir ákveðnum lit af bíl eða manneskju í ákveðnum lit af fötum. Þá sé nauðsynlegt að lögreglumenn sjái liti vel.
Flestir litblindir sjá liti. Þeir sjá bara minni mun á ákveðnum litum en fólk með eðlilega þrílita sjón. Vegna þessa er stuðst við ishihara-prófið.
Fleiri strákar en stelpur litblindir
Samkvæmt rannsókn í Noregi er einn af hverjum tólf drengjum, eða rétt ríflega 8%, þar í landi litblindur en aðeins 0,44% stúlkna eða ein af hverjum 227. Svipaða sögu er að segja annars staðar á Norðurlöndum þar sem litblinda drengja er um 8% en stúlkna undir hálfu prósenti.
Strákar eru því frekar útilokaðir frá þessum störfum en stúlkur.
Ólafur segir að undanþágur séu ekki algengar en hins vegar sé hvert tilfelli skoðað fyrir sig. Fluglæknar, þeir sem meta flugmenn og þeirra hæfni, liðsinna lögreglunni í læknisskoðunum á verðandi lögreglumönnum.
