Læknir sem setti fóstureyðingarlyf í hafragraut barnshafandi kærustu sinnar hefur nú verið sakfelldur fyrir að afla sér bandarísks ríkisborgararéttar með svikum. Hann leyndi brotinu þegar hann sótti um ríkisborgararétt og var eiðsvarinn þegar hann sór að hafa hreina sakaskrá.
Maðurinn heitir Yousif Abdulraouf Alhallaq, er 47 ára og býr í Canton í Ohio. Hann fékk fjögurra ára fangelsisdóm árið 2021 fyrir morðtilraun og alvarlegar líkamsárásir vegna eitrunarinnar. Nú á hann yfir höfði sér allt að tíu ára fangelsi fyrir ríkisborgarasvikin og gæti jafnframt verið sviptur ríkisborgararétti. Bandaríska dómsmálaráðuneytið greindi frá sakfellingunni 8. október.
Þrýsti á hana að fara í fóstureyðingu
Eitrunin átti sér stað í desember 2014. Samkvæmt gögnum læknaráðs Ohio hafði konan þá fengið þær upplýsingar, við tuttugu vikna meðgöngu, að barnið væri með alvarlega meðfædda heilsukvilla. Alhallaq þrýsti á hana að fara í fóstureyðingu en hún vildi halda meðgöngunni áfram.
Hann setti þá lyfið mífepristón í mat hennar án vitundar hennar eða samþykkis.
Konan lýsti því síðar fyrir dómi að hún hefði fengið miklar blæðingar og farið á sjúkrahús, þar sem hún taldi sig vera að missa fóstrið. Alhallaq sat hjá henni á bráðamóttökunni en sagði henni ekki hvað hann hafði gert.
Drengurinn lifði af og fæddist með alvarlega fötlun. Móðirin sagði fyrir dómi að hún hefði árum saman kennt eigin líkama um þjáningar sonarins. Hún hefði meðal annars leitað til lækna til að kanna hvort hún væri með erfðafræðileg vandamál.
Játaði þegar hann vildi eignast fleiri börn
Samkvæmt frásögn konunnar játaði Alhallaq verknaðinn fyrst þegar hann vildi eignast fleiri börn en hún óttaðist að annað barn myndi einnig fæðast með fötlun.
„Þetta voru ekki mistök. Þetta var kaldrifjuð og skipulögð tilraun til að drepa son minn,“ sagði hún fyrir dómi.
Alhallaq játaði morðtilraun og tvær alvarlegar líkamsárásir í september 2021. Auk fangelsisdómsins var hann síðar sviptur lækningaleyfi sínu í Ohio til frambúðar.
Leyndi brotinu í umsókninni
Á meðan konan vissi enn ekki hvað hafði gerst sótti Alhallaq um bandarískan ríkisborgararétt árið 2017.
Í umsókninni svaraði hann neitandi þegar spurt var hvort hann hefði vísvitandi sært eða reynt að særa manneskju og hvort hann hefði framið eða reynt að fremja brot sem hann hefði ekki verið handtekinn fyrir.
Hann staðfesti svörin, eiðsvarinn, í viðtali við útlendingayfirvöld árið 2018 og fékk bandarískan ríkisborgararétt í maí sama ár.
Kviðdómur sakfelldi hann fyrir ríkisborgarasvikin 1. október, samkvæmt staðarmiðlinum Canton Repository. Refsing hans verður ákveðin 19. janúar 2027.
