Úkraínumenn taka á móti leiðtogum Bandalags hinna viljugu ríkja í dag til að knýja á um nauðsynlegan loftvarnarbúnað og aukinn þrýsting á rússnesk stjórnvöld. Linnulausar árásir Rússlandshers með langdrægum eldflaugum hafa síðustu vikur orðið fleiri almennum borgurum að bana en nokkru sinni frá fyrstu mánuðum innrásarinnar.
Eftir hverja árás hefur Volodymyr Zelensky forseti beðið samherja um loftvarnarbúnað, sem orðinn er af skornum skammti. Varnarvopn framleidd í Úkraínu ráða ekki við flaugarnar sem fljúga afar hratt, í háum boga, þannig að erfitt er að stöðva þær.
Breski forsætisráðherrann Andy Burnham verður í Kyiv í sinni fyrstu utanlandsför frá því hann tók við embætti og búist er við að hann tilkynni heimild breskra stjórnvalda til framleiðslu á langdrægum SCALP-eldflaugum í Úkraínu. Emmanuel Macron Frakklandsforseti hét á laugardag afhendingu varnarflauga.
Leiðtogar Bretlands, Frakklands og Þýskalands stýra fundinum í sameiningu, sem haldinn er á þjóðhátíðardegi Úkraínu og þegar nákvæmlega fjögur og hálft ár eru liðin frá upphafi innrásarinnar.
Antonio Costa forseti leiðtogaráðs Evrópusambandsins verður á fundinum í Kyiv auk þess sem margir fleiri leiðtogar taka þátt, sumir gegnum fjarfundabúnað. Zelensky hefur kallað eftir loftvarnarbúnaði og greindi frá því í gær að Úkraína fái nú helmingi færri bandarísk Patriot-eldflaugakerfi en árið 2023.
Það má rekja til þess að Bandaríkjamenn hafa notað þau kerfi sem framleidd eru í stríðinu við Íran. Hann sagði að á sama tíma og um 260 varnarkerfi berist Úkraínu framleiði Rússar um hundrað langdrægar eldflaugar á mánuði.
Úkraínumenn hafa gert eldflaugaárásir langt inn í Rússland, á samgöngumannvirki, orkubú, olíuvinnslustöðvar og vöruhús. Frakkar og Bretar áttu frumkvæðið að Bandalagi hinna viljugu í upphafi til að skipuleggja stuðning við Úkraínu og mögulega friðargæslu komi til vopnahlés eða varanlegs friðar.
Það hefur þróast í sameiginlegan stuðningsvettvang ríkjanna í skugga óvissu um fulltingi Bandaríkjanna undir forsæti Donalds Trump.
Ekkert útlit er fyrir að samkomulag náist um frið meðan Bandaríkin eiga í stríði í Mið-Austurlöndum. Rússar hafa krafist þess að Úkraína gefi eftir stór landsvæði í skiptum fyrir frið sem þarlend stjórnvöld segja jafngilda uppgjöf og gera landið berskjaldað fyrir annarri innrás.
