Jordan Peterson er illa haldinn af sársauka

Tammy og JordanHjónin með nýfætt barnabarn sitt

Mynd: Instagram-skjáskot

Eiginkona Jordan Peterson, Tammy Peterson, segir að hann glími nú við taugaskaða sem hafi haldið honum frá opinberu lífi undanfarið.

Peterson, sem er þekktur klínískur sálfræðingur og vinsæll en umdeildur hlaðvarpsstjórnandi, hefur dregið sig í hlé frá upptökum á YouTube-þætti sínum og hlaðvarpi, sem hefur vakið spurningar meðal aðdáenda.

Samkvæmt fjölskyldu hans er um að ræða „taugaskaða“ sem rekja megi til notkunar geðlyfja á árum áður. Tammy segir að hann sé heima hjá fjölskyldu sinni og fái aðstoð, en að morgnarnir séu honum sérstaklega erfiðir

„Morgnarnir eru honum gríðarlega sársaukafullir og niðurdrepandi. Síðar um daginn finnur hann stundum fyrir einhverri bót,“ segir hún.

Peterson tók áður benzódíazepínalyfið Klonopin, meðal annars á tímabili þegar eiginkona hans greindist með nýrnakrabbamein árið 2019. Þegar hann hætti notkun lyfsins fékk hann alvarleg fráhvarfseinkenni.

Að sögn Tammy þróaði hann með sér sjúkdóminn síðkomin vöðvaóeirð (e. tardive akathisia), sem er langvinn hreyfiröskun sem veldur mikilli innri óróleikatilfinningu og óstöðvandi þörf til hreyfingar. Slíkt getur komið fram sem aukaverkun við að hætta ákveðnum geðlyfjum.

Hún segir að skaðinn af lyfjanotkun fyrir rúmum sex árum krefjist mikillar þolinmæði og umhyggju. Þá gagnrýnir hún heilbrigðiskerfið og telur að það þurfi að taka meiri ábyrgð á áhrifum slíkra lyfja.

Peterson sjálfur hefur áður lýst erfiðu ferli við að hætta á lyfjunum, meðal annars í viðtali við Joe Rogan, þar sem hann sagði hafa upplifað „ótrúlegan sársauka í tvö ár“.

Vinur fjölskyldunnar, Jonathan Pageau, segir að Peterson sé oft yfirbugaður af sársauka og vanlíðan, þó hann geti stundum farið í göngutúra, unnið að verkefnum og átt samræður, þó aðeins í stuttan tíma.

Tammy hafnar jafnframt orðrómi um að Peterson hafi fengið blóðsýkingu vegna stofnfrumumeðferðar. Hún segir að hann hafi aldrei fengið slíka meðferð frá tilteknum lækni og að blóðsýkingin hafi í raun komið upp þegar hann var á gjörgæslu í Sviss vegna lungnabólgu.

Hún segir eiginmann sinn ekki á leið aftur í sviðsljósið á næstunni, þrátt fyrir að samtökin Alliance for Responsible Citizenship, sem hann stofnaði, hyggist halda ráðstefnu í Lundúnum á næstunni.

„Hann er ekki farinn að tala um að fara aftur að vinna,“ sagði Tammy og tók fram að honum „finnist hann vera í annarri vídd sársauka.“ Bætti hún við að lokum: „Hann saknar þess að geta ekki lagt orð í belg um samfélagsmál.“