Þingmaður Sjálfstæðisflokksins, Jón Pétur Zimsen, baðst afsökunar í ræðustól Alþingis vegna ummæla sem hann lét falla í færslu á samfélagsmiðlinum X þar sem hann fjallaði um konur, geðheilsu og „náttúruval“. Ummælin vöktu töluverða gagnrýni og voru af sumum túlkuð sem andmæli við jafnrétti kynjanna.
Í færslunni vísaði Jón Pétur meðal annars til slæmrar geðheilsu ungra kvenna og setti það í samhengi við breytta stöðu kvenna í samfélaginu. Hann benti á að konur væru í auknum mæli í stjórnunarstöðum og í meirihluta háskólanema, samhliða því sem frjósemi minnkar og skilnuðum fjölgar. Þá sagði hann: „Við bælum ekki niður árþúsunda náttúruval vegna skoðana framsækinna háskólamanna af hugvísindadeildum.“
Í ávarpi sínu á Alþingi sagðist Jón Pétur leiður yfir því að orð hans hefðu valdið sárindum og verið skilin sem gagnrýni á konur og starfsval þeirra. Hann kvaðst sjá eftir færslunni og baðst afsökunar.
Ummæli þingforseta vekja einnig athygli
Nokkrum dögum áður en umrædd færsla birtist var forseti Alþingis, Þórunn Sveinbjarnardóttir, gestur í hlaðvarpsþætti kynjafræðingsins Þorsteins V. Einarssonar, Karlmennskan, þar sem fjallað er um kynjað sjónarhorn á völd og viðmið.
Í þættinum sagði Þórunn að feðraveldið væri enn við lýði og setti konum skorður. Í umræðu um ofbeldi og jaðarhópa sagði hún jafnframt að það væri rangt að rekja glæpi til jaðarhópa og bætti við: „Það eru íslenskir karlar sem fremja glæpina.“
Kallað eftir afsökunarbeiðni
Ummæli þingforsetans hafa einnig verið gagnrýnd. Blaðamaðurinn Stefán Einar Stefánsson fjallaði um málið í Þjóðmálum og kallaði orð hennar „ógeðfellda stimplun“. Hann hvatti forseta Alþingis til að biðjast afsökunar á fullyrðingum sínum um glæpahneigð íslenskra karla.
Ólíkar viðbrögð við umdeildum ummælum þeirra tveggja hafa vakið athygli, en Jón Pétur hefur nú beðist afsökunar opinberlega á meðan Þórunn hefur ekki tjáð sig frekar um ummæli sín.
