Chloe Watson Dransfield, sextán ára, var stungin fimm sinnum í hálsinn og bakið. Hún var flutt á sjúkrahús þar sem hún var úrskurðuð látin. Kayla Smith, átján ára, er ákærð fyrir morðið og á öðrum degi réttarhaldanna játaði hún sök.
The Guardian greinir frá vitnisburðum réttarhaldanna. Blake Dowling, átján ára, og Archie Rycroft, tuttugu ára, eru einnig ákærðir fyrir morðið og neita báðir sök. Miðað við vitnisburðinn var Dowling í ástarsambandi bæði með Smith og Dransfield en vitað að þeim kæmi afar illa saman. Þær höfðu aldrei hist áður.
Kvöldið áður hefðu þær rifist og Smith hefði ítrekað hótað að stinga Dransfield. Fyrir árásina sjálfa hafði Dowling með Chloe og talaði í síma við Smith sem var heima hjá afa sínum í austurhluta Leeds með Rycroft. Vinkona Chloe Dransfield var einnig með parinu og sagði fyrir dómi að hún hefði heyrt Smith öskra „Blake, ég ætla að mölva á þér hausinn. Þú skalt sko ekki vera með neinum stelpum. Chloe skal sko ekki vera þarna“.
Þá hafi Dransfield svarað og Smith brugðist við með því að segjast ætla að stinga hana í hálsinn. Rifrildið leiddi til þess að þær sammæltust um að hittast til að eiga í slagsmálum. Dowling pantaði leigubíl til að aka Dransfield til Smith.
Dowling sagði að hann teldi að þær myndu ekki nota nein vopn í slagsmálunum.
Hlógu er þau voru handtekin
Upptökur úr eftirlitsmyndavélum og dyrabjöllumyndavél voru sýndar fyrir dómi. Þar má sjá Smith koma út í garð á heimili afa síns með hníf í hendi og Rycroft á eftir henni. Hún heyrist hrópa „komdu þarna, stóra stelpa“. Skömmu síðar sást Smith hlaupa aftur inn í húsið með Rycroft.
Rycroft er kærður fyrir aðild sína og sagði saksóknari að hann hefði gengið með Smith í slagsmálin, reynt að taka myndskeið af þeim og veitt henni stuðning. Dowling væri einnig sekur þar sem hann hefði vitað að Smith vildi stinga Dransfield og samt sem áður pantað fyrir hana leigubíl.
Afi Smith hringdi á sjúkrabíl og sá nágranni hann gera endurlífgunartilraunir á Dransfield. Hún var flutt á sjúkrahús og úrskurðuð látin þar.
Ákæruvaldið sagði að þegar lögreglan handtók Smith og Rycroft hefðu þau verið hlæjandi og gert grín auk tveggja vina sinna. Einnig hefðu þau andað að sér hláturgasi fyrir framan lögreglumennina.
Réttarhöldin standa enn yfir. Dómarinn sagði að kveðinn yrði upp dómur yfir Smith að þeim loknum en bætti við að eina refsingin sem hann gæti dæmt væri lífstíðarfangelsi. Enn ætti þó eftir að ákveða lágmarkstímann sem hún yrði að afplána.
