Huang sagði af sér sem forstjóri og stjórnarmaður Nvidia í dag og tekur Colette Kress, fjármálastjóri félagsins, við stöðunni tímabundið þar til nýr forstjóri hefur verið ráðinn. Ástæða afsagnarinnar var að upp komst um ástarsambönd Huang, annars vegar með konu sem talin er vera kínverskur njósnari og hins vegar konu sem var undirmaður hans.
Reuters hefur eftir heimildarmönnum sínum að Huang hafi einnig átt í nánu sambandi við þriðju konuna sem var einnig starfsmaður fyrirtækisins. Fjölmiðillinn greinir ekki frá nafni konunnar en tekur fram að fréttamenn þeirra hafi reynt að ná sambandi við hana án árangurs.
Eiginmaðurinn kynnti hana fyrir ástmanninum
Ástarsamband Huang við Alice Huang hefur vakið töluverða athygli en bandaríski herinn telur hana vera njósnara frá kínverska ríkinu. Í ítarlegri grein Wall Street Journal segir að Huang og Alice hafi kynnst í gegnum Kang Wei, eiginmann hennar. Kang virtist samþykkja sambandið og talaði opinberlega um hversu náið sambandið væri.
Kang Wei og Jensen Huang höfðu þekkst í áratugi þegar Kang kynnti Jensen fyrir Alice. Fjöldi ljósmynda er til af Alice og Jensen frá árunum 2024 og 2025. Fjölmiðlar í Taívan birtu til að mynda ljósmynd af dóttur Jensen þar sem hún tók myndir af þeim tveimur í maí árið 2025.
Í greininni er einnig reifað hvernig Kang og Alice hafi nýtt sér sín persónulegu tengsl til að efla fjölda viðskiptaverkefna í Kína, Taívan og víðar. Þau hafi hoppað á milli tækifæra í tölvuleikjabransanum, yfirtökum lyfjafyrirtækja og skýjaþjónustu auk þess að færa eignarhluti sín á milli og spunnið þar með net tengdra félaga. Nú sæta þau fjölda rannsókna vegna þessa, þar á meðal í Singapúr og Taívan.
Bandarískir embættismenn að kínverska leyniþjónustan hafi fengið Alice í sínar raðir til að njósna um Jensen. Kang var handtekinn í Sjanghæ fyrr á árinu vegna rannsóknar á markaðsmisnotkun en var nýlega látinn laus. Hann deildi mynd af sér með vinum nýlega fyrir utan Stanford-háskólann í Kaliforníu í Bandaríkjunum.
Einn margra
Jensen er ekki fyrsti forstjórinn sem lætur af störfum vegna sambands síns við samstarfsmenn. New York Times tók saman nokkra forstjóra sem hafa látið af störfum vegna þessa og má þarf nefna Mark Hurd, sem hjálpaði að gera HP að tæknirisa, en hann var látinn fara árið 2010. Þá kom í ljós að hann hefði ekki greint frá allri notkun sinni á fjármunum fyrirtækisins og átt í nánu sambandi við samningsaðila.
Á liðnu ári var Ashley Buchanan rekinn úr starfi forstjóra keðjunnar Kohl's eftir að fyrirtækið komst að því að hann hefði reynt að beina viðskiptum til birgja sem reyndist vera ástkona hans. Rodney McMullen, forstjóri Kroger matvöruverslunarinnar, sagði af sér einnig í fyrra eftir að rannsókn leiddi í ljós að hegðun hans samræmdist ekki stefnu fyrirtækisins.
Steve Easterbrook var rekinn frá McDonald's árið 2019 vegna sams konar máls. Hann hafði átt í ástarsambandi við undirmann sinn auk annars starfsmanns. Fór svo að McDonald's höfðaði mál gegn Easterbrook og sakaði hann um að hafa logið og leynt mörgum samböndum við starfsmenn fyrirtækisins.
