Íslendingar ganga til þjóðaratkvæðagreiðslu á laugardaginn 29. ágúst þar sem spurningin er: „Á Ísland að hefja á ný aðildarviðræður við Evrópusambandið?“
Þorgerður Katrín Gunnarsdóttir utanríkisráðherra var spurð í Kastljósinu hvað gerist þegar niðurstöður atkvæðagreiðslunnar liggja fyrir.
Þorgerður Katrín segir að verði svarið já verði Evrópusambandinu tilkynnt um niðurstöðuna.
„En fyrst og síðast ætla ég að hafa, að sjálfssögðu, samband við utanríkismálanefnd,“ segir Þorgerður Katrín. „Mér finnst mjög mikilvægt, hvort sem það verður já eða nei, að utanríkismálanefnd komi strax saman og við spjöllum saman um hvernig við gerum þetta,“ segir hún.
Þar á eftir verði farið í að mynda samninganefnd sem færi fyrir viðræðum við Evrópusambandið.
„Og það er alveg ljóst að við munum leita til hagsmunaaðila, verkalýðshreyfingarinnar, atvinnurekenda, fyrirtækja í sjávarútvegi og landbúnaði,“ segir Þorgerður Katrín sem telur það skipta miklu máli að svari þjóðin já í atkvæðagreiðslunni verði hún að fara til viðræðna við ESB sem ein heild. Leggja verði til hliðar allt sem gerðist fyrir atkvæðagreiðsluna svo Ísland geti sameinast um verkefnið.
„Við eigum að velja okkar landslið í samninganefndina. Ríkisstjórnin er ekki að fara að semja heldur veljum við okkar besta fólk, reynslubolta, kannski einhverja hákarla þarna inn á milli líka,“ segir Þorgerður. Viðbúið er að samningar við Evrópusambandið geti tekið eitt og hálft til tvö ár.
Horfa má á viðtalið við Þorgerði Katrínu í heild sinni í spilaranum hér fyrir neðan.
Hið augljósa í málinu er að með því hefjast ekki aðildarviðræður við Evrópusambandið. Þorgerður segir það skýrt að forystukonur ríkisstjórnarinnar hafi áður gefið út að með því falli niður allar vangaveltur núverandi ríkisstjórnar um aðild.
Aðspurð hvort ganga þurfi lengra og skilaboðin séu þau að Alþingi verði þá að leggja fram og samþykkja að aðildarviðræður séu dregnar til baka segir Þorgerður að niðurstaða þjóðaratkvæðagreiðslunnar verði virt.
„Ef það verður nei, þá mun ég tala strax við utanríkismálanefnd þingsins,“ segir hún. Ekki verði farið í kringum Alþingi líkt og hafi verið gert þegar viðræður stöðvuðust árið 2013.
Mikið hefur verið deilt um hvort ríkisstjórn Sigmundar Davíðs Gunnlaugssonar og Bjarna Benediktssonar hefði dregið umsókn Íslands til baka en vissulega héldu viðræður við Evrópusambandið ekki áfram á þeirra stjórnartíð eða eftir hana.
Aðspurð hvort ganga verði lengra en að hætta bara við viðræður og hvort Ísland ætli þá að draga umsókn sína til Evrópusambandsins formlega til baka segir Þorgerður að það verði rætt í þinginu.
„Það verður strax talað við þingið og ráðið saman hvað gerist, hvort sem það er að afturkalla umsóknina formlega eða annað,“ segir hún.
Alveg öruggt sé þó að verði svarið nei muni núverandi ríkisstjórn ekki taka málið upp aftur. Það þýði þó ekki að málið verði ekki tekið upp af annarri ríkisstjórn síðar meir.
