Ísraelar eru viljandi að beina árásum sínum að börnum á Gaza og stuðla þar með að þjóðarmorði, að mati rannsóknarnefndar á vegum Sameinuðu þjóðanna.
Í niðurstöðu nýrrar skýrslu segir að palestínsk börn „hafi verið vísvitandi skotmörk ísraelskra öryggissveita og verið drepin.“
Sú staðreynd sé lykilþáttur í því að staðfesta áform ísraelskra yfirvalda og öryggissveita um þjóðarmorð og eyðingu stærri hóps Palestínumanna á Gaza.
Þessi skýrsla kemur í framhaldi af fyrri skýrslu hópsins frá því í september þar sem hún komst að því að Ísrael fremji þjóðarmorð á Gaza.
Í nýju skýrslunni segir að Ísraelsher hafi haldið áfram umfangsmiklum og kerfisbundnum hernaðaraðgerðum með fordæmalausum dauðsföllum, meiðslum og áföllum fyrir palestínsk börn.
„Rökstuddar ástæður“ væru til þess að álykta að yfirvöld og herinn hafi „haldið áfram að fremja þjóðarmorð“ á Gaza.
Í yfirlýsingu nefndarinnar segir að æsku barna á Gaza hafi verið útrýmt vegna þess að þau séu sködduð á líkama og sál, hafi upplifað sameiginleg áföll, mörg séu munaðarlaus, hafi orðið viðskila við fjölskyldu, örkumlast, þurft að leggjast á flótta og upplifað hungursneyð. Heilbrigðiskerfið og menntakerfið hafi einnig hrunið. Þetta haldi áfram að hafa áhrif á börn alla ævi.
„Með því að beina árásum að börnum er Ísrael að ráðast á getu palestínsku þjóðarinnar til að lifa af og ákvarða framtíð sína,“ sagði indverski dómarinn Srinivasan Muralidhar, sem fer fyrir rannsóknarnefndinni.
Hvað varðar skráningu glæpanna sagði Muralidhar: „Ísraelskir hermenn hafa sjálfir opinberað mörg sönnunargögn um það sem þeir hafa verið að gera og er hægt að sakfella þá fyrir.“
Skortur á trúverðugum aðferðum til að staðfesta fullyrðingar
Stjórnvöld í Ísrael hafa lengi verið gagnrýnin á nefndina. Utanríkisráðuneyti Ísraels sagðist alfarið hafna skýrslunni og sagði nefndina gallað kerfi sem hefði haft það að markmiði að einangra og rægja Ísrael frekar en að leita sannleikans.
„Skýrslan útilokar algjörlega ísraelsk börn sem voru myrt á grimmilegan hátt, rænt og skotmörk Hamas-samtakanna, en hunsar kaldhæðnislega notkun Hamas á palestínskum börnum sem mannlegum skjöldum og verkfærum.“
Ráðuneytið sakaði nefndina um skort á trúverðugum aðferðum til að staðfesta fullyrðingar sínar.
Stjórnvöld í Ísrael hafa staðfastlega hafnað ásökunum um þjóðarmorð og segja hernaðaraðgerðir á Gaza vera í sjálfsvörn, til þess að sigra Hamas og aðra vopnaða hópa Palestínumanna og til að tryggja að ísraelskir gíslar sem Hamas-liðar rændu 7. október 2023 verði látnir lausir.
