Nýliðinn júnímánuður var sá hlýjasti í Vestur-Evrópu og sá næsthlýjasti á heimsvísu frá upphafi mælinga. Frá þessu greinir evrópska loftslagsstofnunin Kóperníkus.
Í Evrópu var meðalhitinn 19,14 stig í júní. Það er 1,78 stigum yfir meðaltali áranna 1991 til 2020. Frávikið nam rúmum þremur stigum í Vestur-Evrópu þar sem meðalhiti mánaðarins var 20,74 stig. Á heimsvísu var meðalhitinn í júní 16,54 stig. Það er rúmu hálfu stigi yfir meðaltali.
Kröftug hitabylgja geisaði í stórum hluta Evrópu dögum saman í seinni hluta júní og hitamet féllu í fjölda Evrópulanda. Hún hafði alvarleg áhrif á heilsu fjölda manna og olli mikilli fjölgun dauðsfalla í álfunni.
Tíðari öfgar í veðri valda áskorunum
Hitamet voru einnig slegin í Evrópu í maí og þá létu hitabylgjur aftur á sér kræla í upphafi þessa mánaðar. Þessi röð hitabylgja sýnir svo ekki verður um villst að Evrópa stendur frammi fyrir auknum áskorunum af völdum sífellt tíðari öfgum í veðri, að því er segir í tilkynningu Kóperníkusar.
Þá var tíðarfar einkar þurrt í júní. Í svo miklum hlýindum skapar það kjöraðstæður fyrir gróðurelda til að dreifa úr sér. Þeir voru áberandi, einkum á Íberíuskaga og í suðurhluta Frakklands í síðasta mánuði.
„Júní 2026 undirstrikar hversu rækilega loftslagið er að breytast,“ segir Samantha Burgess, stjórnandi hjá Kóperníkusi. Loftslagsbreytingarnar valdi ákafari hitabylgjum og viðvarandi hlýindum í sjó. Þá stafi heilsu fólks, vistkerfum og innviðum, jafnt innan Evrópu sem og utan álfunnar, aukin hætta af völdum loftslagsbreytinga.
