Skotar unnu 1–0 sigur á Haítí í C-riðli HM í fótbolta í nótt.
Leikurinn var heldur bragðdaufur en eina markið kom á 28. mínútu þegar Skotinn John McGinn skoraði eftir skot innan úr teig. Boltinn hafði viðkomu í varnarmanni og breytti um stefnu eftir að markvörður Haítí hafði þegar skutlað sér í hitt hornið.
Haítímenn voru sterkari í síðari hálfleik. Þegar um fimm mínútur voru eftir af leiknum var Frantzdy Pierro nálægt því að jafna metin með skalla, en boltinn fór rétt framhjá.
Þetta var fyrsti leikur Skota á HM síðan í Frakklandi 1998. Þá var þetta fyrsti sigur landsins í leik á HM síðan á Ítalíu 1990.
Sigurinn gæti reynst Skotum dýrmætur. Liðin eru í riðli með Brasilíu og Marokkó, sem sitja í 6. og 7. sæti heimslistans, og var fyrir fram gert ráð fyrir að þau myndu enda í efstu sætum riðilsins, en Skotar og Haítímenn berjast um þriðja sætið.
Brasilía og Marokkó gerðu 1–1 jafntefli í sínum leik í gærkvöldi. Því eru Skotar á toppi C-riðils eftir fyrstu umferð.
