Þann 6. maí síðastliðinn úrskurðaði fyrirtækjaskrá Skattsins að aðalfundur félagasamtakanna Vorstjörnunnar þann 30. júní 2025 hefði verið ólögmætur. Hefur fyrirtækjaskráin þar með hafnað skráningu tilkynningar um breytingu á stjórn Vorstjörnunnar sem barst fyrirtækjaskrá 14. júlí 2025. Byggir höfnun skráningarinnar á þeim grundvelli að ákvarðanir um þær breytingar hafi ekki verið teknar á lögmætum aðalfundi félagsins, líkt og samþykktir félagsins gera ráð fyrir.
Vorstjarnan er félag sem tengist Sósíalistaflokki Íslands sterkum böndum og þessi tíðindi eru hluti af átökum stríðandi fylkinga um völd í flokknum og völd yfir fjárreiðum hans.
Í maí árið 2025 varð hallarbylting í Sósíalistaflokknum. Listi sem stillt hafði verið upp til höfuðs lista ráðandi afla í flokknum með þau Sönnu Magdalenu Mörtudóttur og Gunnar Smára Egilsson í broddi fylkingar hafði betur í kosningun til framkvæmdastjórnar á aðalfundi flokksins.
Hin áður ráðandi öfl í flokknum beittu sér fyrir endurnýjun á stjórn Vorstjörnunnar og efnt var til aðalfundar 30. júní 2025. Þar var ný stjórn kjörin yfir Vorstjörnunni og meðal stjórnarmanna voru Sanna Magdalena, Sara Stef. Hildar (sem jafnframt var kjörin gjaldkreri), María Lilja Ingveldar- Þrastardóttir Kemp og Guðmundur Auðuns. Allir stjórnarmenn voru hliðhollir áður ráðandi öflum í Sósíalistaflokknum.
Sigrún Unnsteinsdóttir, fráfarandi stjórnarmaður í Vorstjörnunni, sendi kvörtun til fyrirtækjaskrár vegna stjórnarkjörsins og sagði aðalfundinn ekki hafa verið löglega boðaðan þar sem stjórn félagsins hefði ekki boðað til hans.
Fyrirtækjaskrá tók undir sjónarmið Sigrúnar, eins og áður segir, en ákvörðunin er ekki birt fyrr en tæplega ári eftir kæruna.
Gjaldkerinn Sara Stef. hefur sent tilkynningu vegna málsins til félaga í Vorstjörnunni, þar sem greint er frá ákvörðun fyrirtækjaskrár. Ennfremur segir:
„Við sem kosin voru í stjórn 2025 erum nú umboðslaus og vísum á Sigrúnu Unnsteinsdóttur fyrir frekari upplýsingar um framhald félagsins en einnig má finna upplýsingar um stjórn félagsins hjá Fyrirtækjasrká. Unnið verður að því að tæma húsnæði félagsins að Bolholti 6 næstu vikurnar.“
Skrúfað fyrir styrk til Samstöðvarinnar sem lifir þó
Vorstjarnan og systufélag hennar, Alþýðufélagið, hafa á undanförnum árum hvort um sig fengið 10 til 15 milljónir á ári í lán og styrki frá Sósíalistaflokknum en hann hefur endurtekið fengið framlag frá ríkinu þar sem hann hefur náð yfir 2,5% fylgi í alþingiskosningum. Alþýðufélagið fékk styrki 2021 og 2022 og Vorstjarnan lán 2023 og 2024. Samstöðin fékk lán á árunum 2022-2025. Samstöðin er í eigu Alþýðufélagsins en Vorstjarnan er sjálfstætt félag.
DV hefur heimildir fyrir því að engin slík lán eða styrkir hafi runnið til Vorstjörnunnar, Alþýðufélagsins eða Samstöðvarinnar á þessu ári og muni ekki gera það. Samstöðin, sem einnig reiðir sig á frjáls framlög notenda, virðist engu að síður lifa góðu lífi og heldur uppi öflugri dagskrá í sjónvarpi og útvarpi.
