„Fyrir hverja er verið að fara þessa blönduðu leið? Fyrir hverja starfa stjórnvöld?“ spyr Alma Hafsteinsdóttir, formaður Samtaka áhugafólks um spilafíkn. Samtökunum var nýlega boðið til fundar með spretthópi dómsmálaráðherra um stefnumótun í málefnum fjárhættuspila. Þau mótmæla svokallaðri „blandaðri leið“ í opnu bréfi til dómsmálaráðherra.
„Miðað við þær hugmyndir sem þau virðast vera að einblína á, þessa blönduðu leið, þá veltum við fyrir okkur fyrir hverja er verið að vinna þessa vinnu. Af því að í samfélaginu er ekki verið að óska eftir meira aðgengi að fjárhættuspilum. Þvert á móti,“ segir Alma í samtali við fréttastofu RÚV.
86 prósent vilja loka spilakössum
Til að mynda hafi nemendur og stúdentaráð Háskóla Íslands kallað eftir því að spilakössum á vegum háskólans verði lokað. Þá vilja 86 prósent Íslendinga að spilakössum landsins verði lokað samkvæmt könnun sem Gallup vann fyrir Samtök áhugafólks um spilafíkn árið 2020.
Blandaða leiðin sem spretthópur dómsmálaráðherra hafi stefnt að felur í sér að setja erlendum veðmála- og fjárhættuspilasíðum hömlur og leyfa innlendum stofnunum sem fá nú þegar að reka spilakassa að færa starfsemi sína á netið.
Alma segir þessar stofnanir gagnrýna erlend fjárhættuspil og óreiðuna sem þeim fylgi ekki vegna þess að þær vilji loka fyrir fjárhættuspil heldur vegna þess að þær vilja sjálfar komast inn á markaðinn.
„Við erum ekki einu sinni með meðferð við spilafíkn“
Alma segir Ísland engan veginn í stakk búið að takast á við svokallaða blandaða leið. Önnur lönd sem hafi farið þessa leið séu í stökustu vandræðum.
„Og þó hafa mörg þeirra meðferðir við spilafíkn og eru í hinum ýmsu átökum, herferðum gegn fjárhættuspilum og fræðslu varðandi spilafíkn. Íslendingar eru ekki að því, síður en svo. Við erum ekki einu sinni með meðferð við spilafíkn,“ segir hún.
Fólk sem þrói með sér spilafíkn þurfi að borga um fjórar milljónir til að komast í meðferð erlendis.
Alma bendir á að hér á landi gildi lög um fjárhættuspil sem íslenskum stjórnvöldum hafi ekki tekist að framfylgja.
„Stjórnvöld hafa algjörlega brugðist samfélaginu í eftirliti með þó þeirri löggjöf sem er núna. Þannig við veltum fyrir okkur hvort þetta sé einhver nýbreytni hjá stjórnvöldum að ef þau ráða ekki við þau lög og þær reglugerðir sem þau þó setja sjálf, ætla þau þá bara að lögleiða allt?“
