Danskur tónlistarfræðinemi, Carl Emil Martin, hefur vakið athygli fyrir að afhjúpa hina fullkomnu laglínu. Laglínuna má heyra í mismunandi útfærslum í tugum ef ekki hundruðum popplaga. Sjálfur kennir Carl Emil laglínuna við Alpha-kynslóðina þar sem flest lögin voru samin á öðrum og þriðja áratug þessarar aldar. Sé litið út fyrir popptónlistarstefnuna má jafnvel finna dæmi úr klassískri tónlist frá 19. öld.
Hundruð laga í viðbót noti svo afbrigði laglínunnar en Carl vill ekki setja þau undir sama hatt.
Carl Emil greinir frá uppgötvun sinni í myndbandi á YouTube sem hefur fengið nærri fjórar milljónir áhorfa. Hann segir að lagið APT. með ROSÉ og Bruno Mars hafi komið honum á sporið. Það hafi minnt hann á Reckless með Madison Beer og Ode to the Mets með The Strokes.
Í myndbandinu útskýrir hann að laglínan byggi á fjórum tónum sem spilaðir eru í ákveðinni röð en þó með öðrum tónum á milli, sem geta verið breytilegir.
Þrjú dæmi má heyra í spilaranum hér fyrir neðan. Þar eru brot úr áðurnefndum lögum með Madison Beer og the Strokes auk Sofia með Clairo. Öll nota þau þessa sömu laglínubyggingu.
Laglínan í almannaeigu
Í viðtali við danska ríkisútvarpið segir Carl Emil að þar sem ekki megi rekja laglínuna til ákveðins höfundar sé hún í almannaeigu og því öllum frjálst að nota hana.
Spurður að því hvort tilviljun ein ráði því að laglínan skjóti kollinum upp aftur og aftur segir Carl Emil að það séu ekki óendanlega margar laglínur sem hægt sé að spila yfir algenga hljómaganga.
„Það eru kannski fimm til tíu hljómagangar sem notaðir eru aftur og aftur. Alpha-kynslóðar laglínan passar virkilega vel yfir nokkra þeirra,“ segir Carl Emil.
Þá segir hann að laglínan hljómi einfaldlega mjög vel.
„Að lokum held ég að þetta snúist um að fólk hefur verið með hljómagang fyrir framan sig og leikið sér á gítarinn eða píanóið. Það hefur hugsað með sér að þessi laglína passi virkilega vel við hljómaganginn.“
Enginn skortur á sköpunarkrafti
Carl Emil kveðst ekki áhyggjufullur yfir sköpunargáfu nýrrar kynslóðar poppstjarna.
„Það eru margir aðrir þættir en aðeins laglínan sem eru í mikilli þróun. Til dæmis eru pródúsentarnir margir mjög framúrstefnulegir, samanborið við fyrir 20 árum.“
Sjálfur segist hann ekki verða þreyttur á því að heyra lögin þrátt fyrir að þau minni hvert á annað. Hann hefur útbúið sér langan lagalista með öllum dæmunum sem hann hefur fundið og hann hlusti enn á þau. Honum finnist þau einfaldlega hljóma vel.
