Bresk hjón sem fluttu ásamt þremur ungum börnum sínum til Balí í Indónesíu fyrir tveimur árum segjast ekki hafa í hyggju að snúa aftur til Bretlands. Að þeirra sögn hefur flutningurinn gjörbreytt lífsgæðum fjölskyldunnar og reynst besta ákvörðun sem þau hafa tekið.
Lucy Argent, 41 árs, og eiginmaður hennar Paul, 36 ára, yfirgáfu heimili sitt í Cambridgeshire þrátt fyrir að búa við fjárhagslegt öryggi, góða atvinnu og stöðugt fjölskyldulíf. Þau sögðu Daily Mail sögu sína en heimili sínu á Bretlandseyjum breyttu þau í Airbnb-leigueign og lifa þau nú eingöngu á tekjunum sem þau fá fyrir að leigja það út.
Lífið var bara vinna og rútína
„Við áttum gott líf í Bretlandi, en okkur fannst eins og við værum ekki raunverulega að lifa,“ segir Lucy. Hún segir að eftir fæðingu þriðja barns þeirra hafi hún farið að velta fyrir sér hvort lífið ætti að snúast um annað en vinnu og daglega rútínu og hvort hún myndi hreinlega þola það næstu 30 árin.
Fjölskyldan býr nú í villu þar sem mörkin milli inni- og útirýmis eru óljós. Húsið er án glugga og hurða, en rúllutjöld eru notuð til að verja innra rýmið þegar mikið rignir. Að sögn Lucy hefur fjölskyldan aðlagast þessum lífsstíl vel.
„Við höfum vanist því að hafa hvorki glugga né hurðir. Nú finnst þetta alveg eðlilegt,“ segir hún.
Villan er umlukin sundlaug og garði, en stofan er nær alfarið utandyra með útsýni yfir sundlaugarsvæðið. Þrátt fyrir opið skipulag er húsið búið loftkælingu og viftum og fjölskyldan notar reykelsi til að halda moskítóflugum frá.
Ótrúlega ódýrt
Lucy segir að kostnaður við að búa á Balí sé aðeins brot af því sem hann er í Bretlandi. Fjölskyldan treystir að mestu á tekjur af Airbnb-leigu á eign sinni í heimalandinu til að standa undir framfærslu.
Þetta hefur gert það að verkum að hvorki Lucy né Paul þurfa að vinna og eru þau hjónin mikið úti í náttúrunni að njóta lífsins með börnum sínum. Ein stærsta breytingin frá lífinu í Bretlandi segir Lucy að nú sér nær aldrei kveikt á sjónvarpi.
„Við erum meira úti, sjónvarpið er sjaldan í gangi og við erum mun virkari en áður. Börnin dafna í þessu umhverfi,“ segir hún.
Hjónin hafa deilt reynslu sinni af nýju lífi á samfélagsmiðlinum TikTok þar sem þau hafa safnað yfir 100 þúsund fylgjendum. Nýlegt myndband þar sem þau sýndu heimili sitt vakti mikla athygli og hefur verið horft á það meira en 500 þúsund sinnum.
Lucy segir að ef fjölskyldan fái einhvern tímann tækifæri til að byggja eigið hús muni það líklega vera hannað með sama hætti, þar sem innra og ytra rými renna saman.
„Við héldum að við myndum vilja nútímalegt hús, en eftir að hafa búið hér myndum við velja hefðbundna balíska hönnun. Hún hentar fjölskyldulífi einstaklega vel,“ segir hún.
Aðspurð segist hún ekki sjá fyrir sér að flytja aftur til Bretlands. „Við munum aldrei búa í Bretlandi aftur,“ segir hún ákveðin.
