Fleiri eru neikvæðir en jákvæðir gagnvart því að Dagur B. Eggertsson verði næsti varaformaður Samfylkingarinnar.
Þetta kemur fram í nýrri skoðanakönnun Gallup sem Þjóðmál létu gera fyrir sig.
Guðmundur Árni Stefánsson tilkynnti eftir sveitarstjórnarkosningarnar að hann hygðist hætta í pólitík og stíga til hliðar sem varaformaður Samfylkingarinnar.
Ljóst er að flokksráð Samfylkingarinnar mun því velja nýjan varaformann þar til efnt verður til landsfundar.
Ýmsir hafa verið nefndir til sögunnar, þar á meðal Dagur B. Eggertsson, Jóhann Páll Jóhannsson og Guðmundur Ari Sigurjónsson.
Fleiri neikvæðir en jákvæðir
Samkvæmt könnun Gallup eru 42,7 prósent neikvæð gagnvart því að Dagur taki við embættinu en 23,2 prósent jákvæð. Þá taka 34,1 prósent hvorki afstöðu með né á móti.
Af þeim sem eru jákvæðir eru 11,4 prósent mjög jákvæðir en meðal þeirra sem eru neikvæðir eru 30,9 prósent mjög neikvæðir.
Karlar frekar jákvæðari en konur
Fólk á aldrinum 30–39 ára reyndist neikvæðast gagnvart Degi en jákvæðasta afstaðan mældist meðal þeirra sem eru 18–29 ára.
Karlar reyndust jákvæðari gagnvart Degi en konur, þó þeir væru einnig líklegri til að taka neikvæða afstöðu.
Niðurstöðurnar benda jafnframt til þess að Reykvíkingar séu almennt jákvæðari gagnvart Degi en fólk á landsbyggðinni.
Þá kemur fram munur eftir menntun. Dagur nýtur minni stuðnings meðal þeirra sem hafa grunnskólapróf sem hæstu menntun en meiri meðal þeirra sem lokið hafa háskólaprófi.
Jákvæðari meðal stuðningsmanna Samfylkingar
Hann mælist neikvæðastur meðal fólks með efri millitekjur en jákvæðastur meðal þeirra sem eru með neðri millitekjur.
Meðal stuðningsmanna Samfylkingarinnar mælist afstaðan til Dags hins vegar jákvæðari.
Stuðningsmenn Miðflokksins og Sjálfstæðisflokksins eru helst andvígir Degi.
Niðurstöðurnar eru fengnar úr netkönnun sem Gallup gerði dagana 28. maí til 9. júní. Heildarúrtaksstærð var 1.998 og þátttökuhlutfall 40,1%. Einstaklingar í úrtaki voru handahófsvaldir úr viðhorfahópi Gallup.
