Vilhjálmur Birgisson, formaður Verkalýðsfélags Akraness, fagnar því að hvalveiðivertíðin sé komin af stað af fullum krafti eftir að tvær landreyðar komu á land í Hvalfirði í nótt. Hann segir veiðarnar skipta atvinnulífið á Akranesi miklu máli og skapa bæði starfsfólki og sveitarfélaginu verulegar tekjur.
„Þetta eru tugir milljóna í útsvarstekjum. Þetta skiptir líka ríkissjóð máli. Þetta skiptir fyrst og fremst máli fyrir þau sem starfa þarna. Þetta er unnið í þrjá mánuði, allan sólarhringinn, þannig að tekjumöguleikar þeirra sem vinna þarna eru umtalsverðir."
Vilhjálmi reiknast til að starfsmaður sem tekur allar vaktir geti verið með upp undir tvær milljónir á mánuði í laun.
„Þetta eru tekjumöguleikar sem íslensku verkafólki stendur almennt ekki til boða. Þannig að þetta skiptir miklu máli fyrir okkur."
Aðspurður um gagnrýni og mótmæli vegna hvalveiða segir Vilhjálmur að málflutningur verndunarsinna sé að mörgu leyti „úti á túni“ eins og hann orðar það.
„Ég vil rifja upp að árið 2009 var spáð að hér yrði hrun í ferðamennsku ef hvalveiðar yrðu heimilaðar en það varð ekki. Ég virði skoðanir þeirra en hef litlar áhyggjur af þeim."
