„Ef Óman þvælist fyrir, sprengjum við þá í tætlur" - Vísir

„Ef Óman þvælist fyrir, sprengjum við þá í tætlur."

Þetta er meðal þess sem Trump sagði í viðtali við Trey Ingst, fréttamann Fox News.

Sextíu daga vopnahlé Bandaríkjanna og Íran rennur út í dag. Framhaldið þykir mjög óljóst. Bandaríkjamenn og Íranir virðast fjarri því að ná saman um það hvernig hægt sé að binda enda á stríðið.

Sjá einnig: Dregur enn frekar úr líkum á samningi með skaðabótakröfu

Ráðamenn í Óman hafa átt í viðræðum við erindreka klerkastjórnarinnar í Íran um mögulega lausn á því hvernig stjórna á umferð um Hormússund í framtíðinni. Erindrekar frá Óman fóru í síðasta mánuði til Íran og kynntu þar tillögu að samkomulagi sem studd var af leiðtogum annarra ríkja við Persaflóa. Sú tillaga fól meðal annars í sér valfrjáls gjöld fyrir siglingar um sundið.

Þeirri tillögu höfnuðu Íranir en viðræður hafa haldið áfram. Harðlínumenn innan ríkisstjórnarinnar hafa haldið árásum á skip á Hormússundi áfram á meðan aðrir segja viðræður ganga vel.

Sjá einnig: Íranir segja viðræður á lokametrunum

Verulega hefur dregið úr siglingum um sundið á undanförnum mánuðum vegna stríðs Bandaríkjamanna og Ísraela gegn Írönum. Þegar stríðið hófst gerðu Íranir árásir á skip á sundinu, komu þar fyrir tundurtuflum og lýstu því yfir að sundinu væri lokað. Hins vegar væri hægt að komast þar í gegn ef klerkastjórnin fengi toll.

Þetta hefur haft gífurleg áhrif á olíumarkaði um heiminn allan, þar sem um fimmtungur allrar olíu heimsins og gífurlega mikið jarðgas var flutt um Hormússund fyrir stríðið.

Trump hefur ítrekað haldið því fram að þegar stríðinu ljúki muni hann lýsa því yfir að sundið verði bandarískt hafsvæði og að Bandaríkjamenn muni stjórna því til frambúðar.

Sjá einnig: Hótar að gera Hormússundið að bandarísku yfirráðasvæði

Þetta sagði Trump síðast núna um helgina.

Áður hefur hann gefið í skyn að Bandaríkin gætu reynt að rukka toll um siglingar um sundið.

Bara búnir að nota „tittlingaskít“

Í viðtalinu við Yngst sagði Trump einnig að erindrekar sínir ættu í viðræðum við Írani á bak við tjöldin og þá sérstaklega við leiðtoga íranska byltingarvarðarins. Það er langöflugasta deild herafla Íran og Byltingarvörðurinn spilaði stóra rullu í því að koma Mojtaba Khamenei til valda eftir að faðir hans, Ali Khamenei, var felldur í loftárás.

Stríðið gegn Íran hefur reynst verulega óvinsælt í Bandaríkjunum og telja greinendur að óánægjan gæti komið niður á Repúblikönum í þingkosningunum í nóvember.

Trump sagði þó að sér liggi ekkert á þegar kemur að því að binda enda á stríðið.

„Þeir eru góðir í póker en þeir eru að deyja,“ sagði Trump um leiðtoga Byltingarvarðarins.

Þeir leiðtogar eru sagðir mestu harðlínumennirnir í klerkastjórninni.

Sjá einnig: Harðar deilur innan klerkastjórnarinnar

Þegar kemur að vopnabúrum Bandaríkjamanna sagði Trump nóg til í þeim. Fregnir hafa ítrekað borist af því að Bandaríkjamenn hafi gengið verulega á birgðir sínar af ýmsum mikilvægum vopnum og flugskeytum í loftvarnarkerfi.

Í síðasta mánuði gerði Trump hlé á árásum á Íran, eftir að hann fundaði með herforingjum sínum og ráðgjöfum. Á þeim fundi eru margir sagðir hafa lýst yfir áhyggjum af áðurnefndum tómum hillum.

Sjá einnig: Sakar lekamenn um landráð vegna „rangra“ frétta

Í samtali við fréttamann Fox sagði Trump nóg til af vopnum.

„Það sem við erum búnir að nota er bara tittlingaskítur.“

Harðlínumönnum vex ásmegin

Eins og áður segir rennur vopnahléið úr gildi í dag en það hefur staðið yfir í sextíu daga. Þann tíma hafa ráðamenn í Íran notað til að búa sig undir frekari átök við Bandaríkjamenn og auka áhrif sín og þrýstinginn á olíumarkaði, og þar af leiðandi á hagkerfi heimsins.

Samkvæmt heimildarmönnum Wall Street Journal í bæði Íran og nágrannaríkjum landsins hefur harðlínumönnunum innan Íran vaxið ásmegin.

Byltingarvörðurinn hefur tekið meiri stjórn á öllum herafla Íran og Íranir hafa átt í samskiptum við bandamenn sína í Jemen og Írak, um undirbúning fyrir frekari átök við Bandaríkin og leiðir til að hægja á flutningi olíu og auka þrýstinginn á Trump.

Embættismenn í nágrannaríkjum Íran segjast hafa upplýsingar um að ráðamenn í Íran séu tilbúnir fyrir frekari átök.

Innan klerkastjórnarinnar eru þó menn eins og Masoud Pezeshkian, forseti, sem vara við því að hagkerfi Íran standi höllum fæti og gæti hrunið standi stríðið lengi yfir.