Þingmenn Verkamannaflokksins hópuðust saman í Westminster Hall í breska þinginu til að vera á mynd með nýjum þingmanni flokksins, og líklega verðandi leiðtoga, Andy Burnham.
Hann er nýbúinn að taka formlega við þingsæti flokksins í neðri málstofu breska þingsins. Nick Eardly, fréttamaður BBC, telur að um tvö hundruð þingmenn hafi safnast saman, um helmingur þingflokks Verkamannaflokksins. Meðal þeirra sem voru viðstaddir myndatökuna voru ráðherrar.
Fréttamaður The Guardian bendir á að þar sem það þurfi stuðning 81 þingmanns til að skora leiðtogann á hólm sé sennilega hægt að gera ráð fyrir því, miðað við fjölda þingmanna í myndatökunni, að Burnham verði sjálfkjörinn leiðtogi flokksins.
Andy Burnham er formlega orðinn þingmaður Verkamannaflokksins fyrir Makerfield. Fagnaðarlæti brutust út á bekkjum þingmanna Verkamannaflokksins þegar Burnham kom inn í neðri málstofu þingsins.
Lindsay Hoyle, forseti neðri málstofu breska þingsins, bauð Burnham velkominn í þingsal. Fréttamaður The Guardian segir hann hafa hækkað róm sinn þegar hann sagði: „Við komum núna að Andy Burnham, þingmanni fyrir Makerfield.“
Desmond Swayne, þingmaður Íhaldsflokksins, hrópaði „Róm er bjargað“ þegar Burnham og tveir aðrir þingmenn gengu inn ganginn. Annar þingmaður hrópaði þá að hann væri ekki Messías. Sjá mátti bros á andliti Burnham og heyra hlátur þingmanna.
Burnham las síðan upp eið og skrifaði undir skjal. Því næst tók hann í höndina á Hoyle.
Athöfnina má sjá í spilaranum hér að neðan.
Þá er Andy Burnham loksins kominn til Lundúna þar sem hann tekur formlega sæti á þingi fyrir Makerfield. Lestarferðinni frá Manchester seinkaði lítillega. Fjöldi fjölmiðla beið Burnham þegar hann kom á Euston-lestarstöðina í Lundúnum fyrir um 40 mínútum.
Hann ítrekaði yfirlýsingu sína síðan í morgun þar sem hann þakkaði Keir Starmer fyrir störf í þágu þjóðarinnar. Hann staðfesti einnig að hann ætlaði að bjóða sig fram sem leiðtogi flokksins og þá líklega nýi forsætisráðherra landsins.
Burnham var einnig spurður út í tíst frá 2022 þar sem hann kallaði eftir kosningum daginn sem Liz Truss sagði af sér sem forsætisráðherra.
„Ég held að þú sért komin fram úr þér, forgangsverkefni mitt í dag er að taka við þingsæti Makerfield,“ sagði Burnham.
Hann sagðist vera sorgmæddur yfir því að yfirgefa Manchester þar sem hann var borgarstjóri og sagðist vona að hann hefði skilið svæðið eftir betra en þegar hann tók við því. Búist er við að hann taki formlega sæti á þingi síðdegis þegar neðri málstofa breska þingsins kemur saman.
Það er ágætt í samhengi við fréttir dagsins að benda á að á morgun, 23. júní, eru tíu ár síðan Bretar greiddu atkvæði um úrgöngu úr Evrópusambandinu eftir tæplega 50 ára veru.
Brexit-atkvæðagreiðslan var haldin 23. júní 2016.
33.577.342 greiddu atkvæði og vildi 51,89 prósent fara úr sambandinu. David Cameron, sem þá var forsætisráðherra fyrir Íhaldsflokkinn en vildi vera áfram í ESB, sagði af sér daginn eftir þjóðaratkvæðagreiðsluna. Theresa May tók við embætti forsætisráðherra í júlí.
Síðan þá hefur engin lognmolla verið í kringum bresk stjórnmál og á þeim áratug sem liðinn er hafa sex verið í embætti forsætisráðherra. Með afsögn Keirs Starmers er ljóst að sjöundi forsætisráðherrann tekur við innan skamms.
Volodymyr Zelensky forseti Úkraínu þakkar Keir Starmer fyrir stuðninginn í yfirlýsingu á samfélagsmiðlinum X.
„Keir, þakka þér fyrir samvinnuna, stuðninginn og sameiginlegar ákvarðanir sem hafa hjálpað að gera Evrópu og okkar öryggi sterkara. Bretland hefur verið, er og mun áfram verða leiðtogi í heiminum. Hér í Úkraínu metum við Bretland mikils og hvert samtal sem við höfum átt hefur alltaf verið innihaldsríkt.“
Hann bætti við að Starmer væri alltaf velkominn í heimsókn til Úkraínu. „Keir, þú ert alltaf velkominn sem gestur til Úkraínu.“
Kemi Badenoch, leiðtogi Íhaldsflokksins, spyr sig eftir hverju sé beðið eftir að Wes Streeting tilkynnti stuðning sinn við Andy Burnham.
„Ef þú ætlar ekki fram, eftir hverju bíðum við?“ spurði Badenoch og vitnaði í áætlun sem Starmer talaði um í ræðu sinni þegar hann sagði af sér.
Þar sagði hann tilnefningar fyrir framboð til leiðtoga flokksins opna 9. júlí og að hægt verði að bjóða sig fram í viku. Það sé gert þannig að ef leiðtogakjör fari fram verði kominn nýr leiðtogi þegar þing kemur aftur saman eftir sumarfrí, 1. september.
Lucy Powell, varaleiðtogi Verkamannaflokksins, segir flokkinn standa í þakkarskuld við Keir Starmer, fráfarandi forsætisráðherra og leiðtoga flokksins. Hún segir Starmer hafa gert Verkamannaflokkinn kjörgengan á ný og „leitt okkur til stórsigurs í kosningum fyrir aðeins tveimur árum“.
Hann hafi haft umsjón með mikilvægum árangri síðan þá. Hann unni landi og þjóð og hafi djúpa þjónustu- og skyldutilfinningu. Hann hafi tilkynnt afsögn sína með reisn. Hún hvetur flokkinn til að koma saman og sýna þjóðinni hversu vel valdaskiptin geti verið framkvæmd.
„Við verðum að sýna fram á að framsækin stjórnmál geta breytt lífi fólks til hins betra og séu reiðbúin til að takast á við áskoranir sem við öll stöndum frammi fyrir. Ef okkur mistekst verða afleiðingarnar fyrir lýðræðið og þjónina miklar og hættulegar.“
Aðrir háttsettir innan flokksins hafa einnig lýst yfir stuðningi við Starmer eftir að hann tilkynnti afsögn sína. Shabana Mahmood innanríkisráðherra sagði Starmer hafa leitt flokkinn frá brúninni aftur til valda. Afreki hans verði aldrei gleymt.
Vinnumálaráðherra Bretlands, Pat McFadden, tók undir orð Powell og sagði bæði Verkamannaflokkinn og þjóðina standa í þakkarskuld við Starmer.
Ed Miliband orkumálaráðherra sagði yfirlýsingu Starmer fyrir utan Downingstræti sýna þá miklu reisn og ráðvendni sem einkenni hann.
Ursula von der Leyen, forseti framkvæmdastjórnar Evrópusambandsins, hefur einnig brugðist við afsögn Starmers. Hún þakkar honum fyrir samstarf við ESB og vinnu hans við að styrkja öryggi Evrópu og Úkraínu.
„Það getur tekið leiðtoga mörg ár að vaxa í þann stjórnmálamann sem þú varðst á aðeins tveimur árum.“
Andy Burnham hefur tilkynnt að hann bjóði sig fram sem næsti leiðtogi Verkamannaflokksins. Í yfirlýsingu á samfélagsmiðlum þakkar hann Keir Starmer fyrir störf í þágu þjóðarinnar.
Hann segir fólk vilja hagvöxt, lægri kostnað, betri innviði og tækifæri fyrir næstu kynslóðir. Breytingar á stjórnmálasviðinu megi aldrei draga athygli stjórnmálamanna frá þeirri ábyrgð að bæta líf fólks.
Fjölmiðlafár mætti Burnham á lestarstöðinni
Breskir fjölmiðlar greina frá því að Burnham sé á leið til Lundúna frá Manchester ásamt teymi sínu. Hann kom á Manchester Piccadilly-lestarstöðina fyrir skömmu og var umkringdur ljósmyndurum.
Sam Harrison, fréttamaður BBC, fylgir Burnham og teymi hans. Harrison segir Burnham vera í góðu skapi. Þegar hann spurði hvernig honum liði sagðist Burnham vera ánægður með að vera fulltrúi Makerfield og að það væri það eina sem hann einbeitti sér að.
Wes Streeting ætlar að styðja Andy Burnham í leiðtogakjöri Verkamannaflokksins. Hann sagði af sér sem heilbrigðisráðherra í síðasta mánuði í kjölfar sveitarstjórnarkosninga þar sem flokkurinn beið afhroð til að skora Starmer á hólm.
Streeting segir í yfirlýsingu að eftir sláandi ósigur í kosningunum í maí hafi aukakosningarnar í Makerfield sannað að Verkamannaflokkurinn geti enn unnið hafi flokksmenn hugrekki til að breytast. „Þetta var sigur fyrir samheldni og von frekar en sundrung og hatur.“
Streeting segir sigurinn ekki síður hafa verið Brunhams sjálfs. „Andy hefur sýnt hvað Verkamannaflokkurinn getur verið þegar við erum aðgengileg, sameinuð og í tengslum við líf fólksins sem þessi flokkur var stofnaður til að verða fulltrúi fyrir.“
Streeting segist hafa rætt mikið við Burnham síðustu daga og segist sannfærður um að hann geti byggt upp flokk sem sé aðgengilegur öllum, sem dragi það besta úr stjórnmálahefðum þjóðarinnar og að hann geti unnið baráttuna gegn öflum þjóðernishyggjunnar.
„Við gætum eytt sumrinu í að ræða um smámuni eða brett upp ermar og hjálpað honum að koma á fót þeim breytingum sem flokkurinn okkar og landið þarf. Það er ákvörðunin sem ég tek og ég vona að allir aðrir styðji Andy líka. Við vorum kjörin til að breyta landinu okkar, til að sýna að stjórnmál geti verið afl til góðs og til að skapa tækifæri fyrir alla. Með Andy getum við það enn.“
Fréttin hefur verið uppfærð.
Nigel Farage, formaður Umbótaflokksins, Reform, vill kosningar við fyrsta tækifæri. Hann birti ritgerð á samfélagsmiðlinum X þar sem hann segir að það sé „fáránlegt að þykjast að Andy Burnham hafi einhvers konar umboð til að leiða landið.“
Reform laut í lægra haldi í aukakosningum í Makerfield í síðustu viku þar sem Burnham vann þingsætið. Hann fékk rétt tæplega 25 þúsund atkvæði á meðan frambjóðandi Reform fékk rétt rúmlega 15 þúsund atkvæði. Farage sagði Burnham verða forsætisráðherra á minna en 25 þúsund atkvæðum.
„Ég er ekki smeykur við Andy Burnham eða aðra skotspóna Verkamannaflokksins.“
Farage sagði Starmer óhæfasta forsætisráðherra sem Bretland hefði átt og sagði Burnham eiga eftir að halda áfram stefnumálum Starmers verði hann nýr leiðtogi flokksins.
Keir Starmer hefur tilkynnt afsögn sína úr embætti. En hvað nú?
Starmer sagði í ræðu sinni að opnað yrði fyrir tilnefningar fyrir nýjan leiðtoga 9. júlí og að lokað yrði fyrir þær áður en sumarfrí hefst, sem er viku síðar eða 16. júlí. Það tryggi að nýr leiðtogi verði kominn þegar þing kemur aftur saman eftir sumarfrí sem er 1. september.
Nick Eardley, fréttamaður hjá BBC, spáir í spilin. Hann segir að núna sé tækifæri fyrir Verkamannaflokkinn til að ræða nákvæmlega hvað gerist næst. Flestir þingmenn flokksins vilji leiðtogakjör og Andy Burnham sé langvinsælasti frambjóðandinn þar. Af hverju ætti einhver að bjóða sig fram gegn honum? spyr Eardley.
Wes Streeting sagði af sér sem heilbrigðisráðherra af því að hann ætlaði að skora Starmer á hólm en það hefur ekki enn gerst. Eardley segir nokkra bandamenn hans hafa viðurkennt að hann geri það kannski ekki. Mögulega fái hann stórt hlutverk í ríkisstjórn Burnham í staðinn.
Þó er ekki hægt að útiloka að einhver annar stígi fram. Angela Rayner hefur einnig verið nefnd í þessu samhengi sem og Ed Miliband, orkumálaráðherra og fyrrverandi leiðtogi flokksins. Nafn Shabana Mahmood innanríkisráðherra hefur einnig verið nefnt. En eins og staðan er núna þykir ansi líklegt að Burnham verði forsætisráðherra á næstunni.
Í spilaranum hér að neðan er hægt að horfa á þegar Starmer segir af sér. Áður var ótextuð útgáfa en nú hefur hún verið þýdd.
Verði Andy Burnham, nýkjörinn þingmaður Verkamannaflokksins fyrir Makersfield, einn í framboði til leiðtoga flokksins má búast við að hann geti tekið við um miðjan júlí. Bjóði fleiri sig fram gæti nýr leiðtogi tekið við í lok ágúst.
Starmer hefur tilkynnt Karli Bretakonungi afsögn sína sem leiðtogi Verkamannaflokksins og falið flokksráði að hefja undirbúning fyrir leiðtogaval.
Hann mun gegna embætti forsætisráðherra þar til nýr leiðtogi Verkamannaflokksins verður valinn. Hann heitir nýjum leiðtoga fullan stuðning.
Keir Starmer ætlar að segja af sér sem leiðtogi Verkamannaflokksins. Þetta tilkynnti hann á blaðamannafundinum rétt í þessu.
Starmer hefur hafið ræðu sína.
Ræðupúlti forsætisráðherrans hefur verið komið fyrir og starfsfólk Downingsstrætis 10 er farið að safnast saman fyrir utan. Von er á forsætisráðherranum út á allra næstu mínútum samkvæmt heimildamanni BBC.
Hér er hægt að fylgjast með beinni útsendingu BBC.
BBC greinir frá því að starfsfólk Downingsstrætis 10 hafi hafið undirbúning fyrir blaðamannafund forsætisráðherra fyrir utan húsið.
Andy Burnham þykir líklegur arftaki Starmers. En hver er hann?
Burnham hefur verið borgarstjóri Manchester í níu ár. Hann var áður á breska þinginu sem fulltrúi Leigh á árunum 2001-2017. Hann hefur tvisvar sinnum boðið sig fram sem leiðtoga Verkamannaflokksins, 2010 og 2015, en tapað í bæði skiptin.
Ingibjörg Sara Guðmundsdóttir birti þessa góðu samantekt um Burnham á dögunum.
The Guardian segir á forsíðu sinni að Starmer ætli að tilkynna um hvenær hann hverfi frá störfum og Daily Telegraph greinir frá því að Burnham ætli sér að verða forsætisráðherra Breta fyrir september.
The Independent vitnar svo í Donald Trump Bandaríkjaforseta sem sagði á samfélagsmiðlum í gær að Starmer ætli að segja af sér. Samkvæmt Downingstræti 10 hafa Starmer og Trump ekki talað saman um helgina.
BBC hefur tekið saman forsíður allra helstu dagblaða Bretlands í dag.
Góðan dag.
Augu heimsins verða að líkindum á Downingstræti 10 í London í dag. Búist er við því að Keir Starmer, forsætisráðherra Bretlands og leiðtogi Verkamannaflokksins, tilkynni í dag hvort hann segi af sér embætti og þá hvenær hann víki.
Andy Burnham, fráfarandi borgarstjóri Manchester, vann þingsæti fyrir Verkamannaflokkinn með miklum meirihluta atkvæða í aukakosningum sem haldnar voru á fimmtudaginn og hann þykir líklegur arftaki Starmers.
Starmer hefur legið undir feldi um helgina og er sagður hafa ráðfært sig við fjölskyldu sína og fleiri um stöðu sína og næstu skref. Fjölmiðlar í Bretlandi fylgjast náið með framvindu mála og fjöldi fjölmiðlafólks er nú við Downingstræti 10.
