Framkvæmdastjóri Bílgreinasambandsins segir alvarlegt mál að eftirlit verði haft með olíufélögunum næstu mánuði vegna tímabundinna efnahagsaðgerða ríkisstjórnarinnar. Lækkun á bensínverði muni alltaf skila sér til neytenda.
Lækkun virðisaukaskatts á eldsneyti úr dælu, úr 24 prósentum í 11, tók gildi í dag. Með þessari aðgerð er ríkisstjórnin að bregðast við verðhækkunum á olíu á heimsvísu, og varir lækkunin fram í ágúst. Benedikt S. Benediktsson, framkvæmdastjóri Bílgreinasambandsins, telur að markmiðum stjórnvalda verði náð með þessu.
„Við höfum metið þetta sem svo að þetta sé aðgerð sem að stjórnvöld geta gripið til og bent á að þetta er mjög target-uð aðgerð sem að beinist í raun og veru beint að neytendum, eiga að skila þeim í raun og veru þeim hagsbótum sem ætlunin er og tiltölulega einföld í framkvæmd svona í samanburði við margar aðrar aðgerðir.“
Miðað við verð á eldsneyti í gær var áætlað að lítri af bensíni myndi að meðaltali lækka um 25 krónur á lítrann og lítrinn af dísil um 30 krónur. Samkvæmt síðunni gasvaktin.is sem heldur utan um verð á eldsneyti hjá olíufélögunum, má sjá að verðið hefur lækkað lítillega umfram áætlanir. Mesta lækkunin á bensíni er rúmlega 28 krónur á lítrann og á dísil um rúmlega 33 krónur. Benedikt telur að neytendur komi til með að finna fyrir lækkuninni.
„Svona aðgerð í raun og veru, að lækka skatthlutfall virðisaukaskatts, skilar sér alltaf.“
Of langt gengið í eftirliti
Annar liður í aðgerðunum er tímabundið lagaákvæði sem skyldar olíufélögin til að skila verðlækkun að fullu til neytenda. Samkeppniseftirlitið fylgist með því að það sé gert og má sekta olíufélög sem brjóta lögin.
„Ég get nú verið hreinskilinn með það að við höfum nú bara talið það frekar alvarlegt mál að við erum komin aftur á þann stað að vera með verðlagseftirlit. Og sérstaklega þegar haft er í huga að ríkisskattstjóri hefur þegar eftirlit með þessum skattskilum. Og í raun og veru er virðisaukaskattskerfið þannig uppsett að þú kemst ekkert hjá því að skila skattalækkuninni, eða skatthlutfallslækkuninni út í verðlag. Annars ertu farinn að brjóta gegn virðisaukaskattslögum.
Persónulega og sem lögfræðingi þá finnst mér þetta miklir loftfimleikar í gangi þarna og ég sé ekki að þetta gangi. Og við höfum verið að benda á meðal annars að þarna hafi verið of langt gengið,“ segir Benedikt S. Benediktsson.
