Markmiðið með samfélagsmiðlaátaki gegn kyrkingartaki í kynlífi er ekki það að dæma kynlífsathafnir fólks heldur einfaldlega að vekja athygli á þeim alvarlegu afleiðingum sem slíkar athafnir geta haft í för með sér.
Þetta segir Jenný Kristín Valberg, teymisstýra Bjarkarhlíðar, í samtali við mbl.is.
„Kyrkingar eru alltaf skaðlegar, alveg sama hversu litlum þrýstingi er beitt. Bara það átak sem samsvarar því að opna kókdós, ef þú heldur þeim þrýstingi í hálfa mínútu þá geta orðið mælanlegar afleiðingar,“ segir Jenný og bætir því við að fólk geri sér almennt ekki grein fyrir áhættunni.
Líklega fleiri tilfelli en skýrslur gefa til kynna
Jenný segir það ekki að ástæðulausu að spurt sé um kyrkingartök í skýrslum Bjarkarhlíðar og að mun fleiri verði fyrir kyrkingartökum heldur en skýrslurnar leiði í ljós.
„Þegar við spyrjum um kyrkingartak þá er það kannski í helmingi tilfella sem fólk segir já og það er yfirleitt ef kyrkingartakið er hluti af líkamlegu ofbeldi. En ef við spyrjum svo nánar, til dæmis hvort að þrengt hafi verið að öndunarvegi í kynlífi, kemur oft í ljós að fjöldinn er í raun meiri,“ segir Jenný og áréttar að þau hjá Bjarkarhlíð skrái það einungis niður ef fólk hefur orðið fyrir óumbeðnu kyrkingartaki.
Jenný telur það alvarlegt mál að konur í ofbeldissamböndum tengi ekki kyrkingartökin í kynlífi við líkamlegt ofbeldi. „Gerandinn er að láta vita að hann hafi í rauninni líf þolanda í hendi sér,“ segir Jenný.
Engin staðfest tölfræði til eins og er
Marta Kristín Hreiðarsdóttir hjá Farsældarsviði LRH segir í svari sínu við fyrirspurn mbl.is að ekki sé til nein staðfest tölfræði hjá lögreglu um tíðni kyrkinga í ofbeldis- og kynferðisbrotum. Hún segir ástæðu þess vera að kerfi lögreglunnar hafi ekki boðið upp á slíkar skráningar en tekur jafnframt fram að því hafi nýverið verið breytt.
„Það eru nokkrir mánuðir síðan við fórum að geta skráð þetta og því eru ekki komnar neinar samanburðarhæfar tölur ennþá. Við ætlum að nota sumarið í að rýna í mál og skoða þau út frá þessu,“ segir Marta.
