Allir skipverjarnir á Bandero, skipi Paul Watson samtakanna, 21 að tölu, freista þess að fá endurkomubanni Útlendingastofnunar hnekkt. Lögmaður fólksins gagnvart Útlendingastofnun segist aldrei hafa séð jafn hraða málsmeðferð. Líklega fara þeir fyrstu úr landi í vikunni.
Tvö mál í gangi
Í áhöfn Bandero var 21 skipverji frá 13 löndum. Segja má að tvö mál séu í gangi hvað þau varðar; annars vegar mál Útlendingastofnunar sem hefur vísað öllum úr landi og slíkri brottvísun fylgir bann við að koma aftur til landsins, mislangt eftir því hvaðan fólkið kemur.
Fólkinu er vísað úr landi á grundvelli 98. greinar útlendingalaganna þar sem segir meðal annars að heimilt sé að vísa útlendingi úr landi, sem sé án dvalarleyfis, sé það nauðsynlegt vegna öryggis ríkisins eða almannahagsmuna, en ekki þótti sýnt að fólkið hefði sýnt fram á lögmæti dvalar sinnar.
Hins vegar hefur lögreglan á höfuðborgarsvæðinu sakamál til rannsóknar sem snýr að tilraun áhafnarinnar til að hefta siglingu og veiðar Hvals 9, veiðiskips Hvals hf.
Helgi Þorsteinsson Silva gætir hagsmuna skipverjanna gagnvart Útlendingastofnun. Hann segir að allir skipverjarnir, 21 að tölu, hafi kært brottvísunina.
Sérstök staða
„Aðallega er verið að reyna að fá endurkomubanni aflétt,“ segir Helgi sem segir lagalega stöðu fólksins nokkuð sérstaka - þau eru ekki í gæsluvarðhaldi, en njóta ekki ferðafrelsins og geta ekki farið sjálf úr landi.
„Þá þarf einstaklingurinn að bíða eftir því að íslensk stjórnvöld framkvæmi brottvísunina.“
Hvar heldur fólkið til meðan á þessari bið stendur? „Þetta er breiður hópur, en margir eru um borð.“
Hröð málsmeðferð
Helgi hefur starfað mikið að útlendingamálum og segir málsmeðferðina um margt óvenjulega. „Þetta er langhraðasta málsmeðferð sem ég hef séð. Ákvarðanir eru teknar yfir verslunarmannahelgi, þær eru birtar skömmu eftir það, þær eru kærðar strax og núna er verið að skipuleggja brottvísunina, eða flugferðir þeirra sem eru að fara úr landi og ekkert ólíklegt að það geti gerst í vikunni.“
Margar stofnanir koma að málinu
Nú gæti einhver spurt sig - geta þau ekki siglt á Bandero úr Sundahöfn - þ.e. ef kyrrsetningu yrði aflétt?
„Það væri auðvitað mjög snyrtileg lausn.“
En málið er ekki alveg svo einfalt, segir Helgi sem segir að margar stofnanir komi að málinu; auk Útlendingastofnunar eru það Samgöngustofa sem kyrrsetti skipið, Landhelgisgæslan og Ríkislögreglustjóri.
Og líka lögregla, sem lagði hald á sjóferðabók skipsins, en án hennar má það ekki sigla.
„Akkúrat núna finnst þessum lögmanni frekar líklegt að brottvísanirnar verði framkvæmdar áður en öll kurl eru komin til grafar í sakamálarannsókninni,“ segir Helgi.
