Aldrei hafa fleiri skemmtiferðaskip verið innan íslenskrar lögsögu en verða á miðvikudag þegar almyrki verður á sólu. Aðgerðarstjóri hjá Landhelgisgæslunni segir mikinn viðbúnað hjá öllum viðbragðsaðilum.
Þrjátíu og eitt skemmtiferðaskip hefur boðað komu sína til Íslands á miðvikudaginn, sem er um þrefalt fleiri skip en almennt eru úti fyrir ströndum Íslands þegar mest er á sumrin. Um 53 þúsund farþegar og skipsáhafnir verða um borð í skipunum og má áætla að þilför þeirra verði stútfull af fólki sem vilji berja sólmyrkvann augum.
Skipin hafa tvens konar forskot
„Þetta er svona barátta um sekúndur og við vitum það að sólmyrkvinn er sterkastur eða lengstur vestur af landinu þannig að skipin hafa tvenns konar forskot. Í fyrsta lagi komast þau vestar þannig að þau hafa sólmyrkvann aðeins lengur og svo eins og þekkt er hérna á Íslandi, við erum alltaf að elta hvar er gat á himninum, þau geta svolítið elt heiðan himinn, alveg eins og þegar við erum að leita að norðurljósum á veturna,“ segir Sigurður Jökull Ólafsson, framkvæmdastjóri samtakanna Cruise Iceland.
„Það gerist eitthvað í náttúrunni, fuglarnir þagna og það verður eitthvað svona móment. Ég get ímyndað mér ef þú ert úti á hafi, og allir sem hafa komið út á sjó vita að það er alltaf múkk í kringum skipin og hvalir eða eitthvað annað, að ef maður er akkúrat á þessum tímapunkti þegar þetta gerist þá þagnar náttúran,“ segir hann.
130 þúsund ferðamenn berja sólmyrkvann augu
Samkvæmt Ferðamálastofu er áætlað að um 73 til 75 þúsund ferðamenn verði á landinu fyrir utan þá 53 þúsund sem verða á skipunum. Flestir af þessum tæplega 130 þúsund ferðamönnum verða á Vesturlandi þegar myrkvinn gengur yfir. Fyrir utan þennan fjölda mun að öllum líkindum bætast við fjöldi skipa og báta með farþegum sem ekki hafa boðað komu sína því ekki þarf að láta vita af sér fyrirfram nema fara eigi í land. Undirbúningur viðbragðsaðila hefur staðið í ár.
„Það er aukinn viðbúnaður hjá öllum viðbragðsaðilum, bæði á sjó og landi. Við reiknum með að vera með varðskip á þessum slóðum við Bjargtanga þar sem flestir væntanlega safnast saman og svo erum við með tvær þyrlur og áhafnir í viðbragði, önnur verður hérna í Reykjavík og hin á Snæfellsnesi og svo verðum við með báta og samvinnu við Landsbjörg og annað með þeirra viðbragð. Þannig að það eru allir á tánum og við vonum bara að þetta fari allt saman vel,“ segir Einar Heiðar Valsson, aðgerðarstjóri hjá Landhelgisgæslunni.
Varðskip Landhelgisgæslunnar verður í viðbragðsstöðu úti fyrir Bjargtöngum. Flestir sjófarendur hyggjast eflaust slökkva á ljósum og lágmarka þannig ljósmengun en þeim ber þó skylda til að hafa siglingarljósin kveikt.
„En svo er þetta líka spurning um á landi, bæði varðandi löggæslu og fyrir viðbragðsaðila að komast ef eitthvað kemur fyrir. Og við erum með svo sem viðbragð við því bæði þá að nýta þyrlurnar til þess að flytja bæði löggæslu og viðbragðsaðila á milli ef þess þarf,“ segir Einar.
