Útboð á vegum Félagsstofnunar stúdenta á Akureyri fyrir námsgarða við Háskólann á Akureyri hófst í síðustu viku. Byggja á þrjár fjögurra til fimm hæða blokkir við háskólann með 126 rýmum sem allt að 170 manns geta búið í.
„Það hefur verið mikil þörf fyrir á síðustu árum. Þetta eru sem sagt þrjár byggingar við Norðurslóð. Heildarstærðin er um 6700 fermetrar. Þetta eru 62 litlar íbúðir, sem sagt stúdíó og tveggja herbergja íbúðir og 64 einstaklingsherbergi,“ segir Jóhannes Baldur Guðmundsson, framkvæmastjóri FÉSTA.
Mikill áhugi er á uppbyggingunni að sögn Jóhannesar, útboðið er opið til 23. júní:
„Já við nefninlega höfum fundið fyrir miklum áhuga. Bæði af þessum stóru verktökum fyrir norðan og þessum stóru verktökum á landinu, eða höfuðborgarsvæðinu. Við vorum áðan með kynningarfund þar sem þessi áhugi var staðfestur enn meira.“
Hefja framkvæmdir í júlí
Vonir standa til að hægt verði að hefja framkvæmdir í júlí og vinna verkið hratt og örugglega, þar sem mikil vöntun er á húsnæði fyrir háskólanema á Akureyri. Áætluð verklok eru í júní 2029.
„Það er von okkar og uppleggið hjá okkur að við fáum góð tilboð sem við geutm gengið frá samningum bara, miðum við að samningurinn byrji fyrsta júlí. Samkvæmt verkáætlun ættum við vonandi eftir tvö ár tekið að minnsta kosti eitt hús í notkun,“ segir Jóhannes Baldur Guðmundsson.
