Ný rannsókn sýnir fram á að yngri kynslóðir séu að eldast líffræðilega hraðar en forverar þeirra, sem eykur líkurnar á að þær greinist með krabbamein fyrir 55 ára aldur. Lengi vel hefur verið litið á krabbamein sem sjúkdóm sem herjar fyrst og fremst á eldra fólk þar sem hættan eykst eftir því sem líkaminn hefur haft lengri tíma til að safna upp frumuskemmdum.
Rannsóknin var birt á heimasíðu WashU Medicine.
Yngra fólk með greinilegri merki um flýtta öldrun
Vísindamennirnir skoðuðu muninn á raunaldri og líffræðilegum aldri fólks. Í ljós kom að yngra fólk sýndi mun greinilegri merki um flýtta öldrun en þau sem eldri eru.
Niðurstöður rannsóknarinnar sýndu til dæmis að breskt fólk fætt á árunum 1965 til 1974 var með mælanlega meiri kerfislæga öldrun en fólk fætt á árunum 1950 til 1954, þegar miðað var við sama raunaldur. Í bandarískum hópi var munurinn enn ýktari. Þeir sem fæddust á árunum 1990 til 1999 sýndu mun meiri líffræðilega öldrun en þeir sem fæddust á árunum 1965 til 1969.
Þessi aukna líffræðilega öldrun hjá yngra fólki tengdist 8% til 15% aukinni áhættu á snemmbúnum krabbameinum, sérstaklega í lungum, legi og meltingarfærum.
„Lokamarkmið okkar er að ráða í hvernig nútímaumhverfi verður líffræðilega hluti af því að auka líkur á krabbameini,“ segir Yin Cao, dósent og sameindafaraldursfræðingur við WashU Medicine, sem leiddi rannsóknina. „Þetta færir okkur nær því að greina áhættu fyrr og þróa forvarnaraðferðir sem eru sniðnar að líffræði hvers einstaklings.“
Einstök líffæri eldast misjafnlega hratt
Rannsakendur rýndu ekki aðeins í líkamann í heild sinni, heldur skoðuðu þeir einnig öldrun einstakra líffærakerfa með því að mæla prótín og lífvísa í blóði. Í ljós kom að ungt fólk sem mældist með ótímabæra öldrun í ónæmiskerfinu var í meiri hættu á að fá snemmbúið lungnakrabbamein og að hraðari öldrun í fituvef líkamans tengdist beint aukinni áhættu á snemmbúnu ristil- og endaþarmskrabbameini.
Forvarnir verði persónusniðnar
Þótt margir einstakir lífsstílsþættir, svo sem offita, kyrrseta, lélegt mataræði og áfengisneysla, hafi áður verið tengdir við krabbamein hjá ungu fólki, þá vegur hver þáttur fyrir sig frekar lítið í heildarmyndinni samkvæmt rannsókninni. Með því að mæla líffræðilega öldrun tekst vísindamönnum að fanga heildaráhrif allra þessara þátta saman.
Vísindamennirnir vonast til þess að hægt verði að nýta þessar mælingar til að finna ungt og heilbrigt fólk sem er í mikilli áhættu. Með því móti sé hægt að bjóða þeim sérsniðna læknisþjónustu, markvissar forvarnir og snemmgreiningu sem getur bjargað mannslífum, frekar en að treysta eingöngu á almennar ráðleggingar til almennings.
