Brunaverkfræðingur vonar að mikill eldsvoði í Drammen í Noregi veki Íslendinga og aðra til vitundar um brunavarnir í skógi vöxnu landi.
Böðvar Tómasson brunaverkfræðingur segir marga samverkandi þætti hafi valdið því að eldurinn á föstudag breiddist út í yfir hundrað íbúðir. Húsin séu úr tré og byggð á níunda áratugnum þegar brunavarnir voru ekki í hávegum hafðar.
„Síðan auðvitað bætist við þessar aðstæður sem hafa verið í Skandinavíu; hiti og þessi þurrkur í langan tíma hefur gert það að verkum að bæði hafa klæðningarnar þarna verið orðnar þurrar og gróðurinn allt um kring, af því þetta svæði byggðist náttúrulega upp fyrir mörgum áratugum og var orðið ansi gróðursælt og skógur þarna í nágrenninu þannig að það þurfti ekki mikið til þess að eldur breiddist þarna hratt út,“ segir Böðvar Tómasson.
Hann segir aðstæður aðrar og brunavarnir betri í þéttbýli hérlendis en að huga þurfi að sumarhúsabyggðum sem séu margar orðnar mjög gróðursælar.
„Þetta er svona dæmi út frá áhættufræðunum, áhætta sem er hægt og sígandi að aukast. Við erum kannski að byggja einhverja byggð sem uppfyllir reglur þess tíma en síðan vex gróður og við erum að fá aukinn hita og meiri þurrka, meiri öfgar í loftslaginu, þannig að við getum verið að fá aðstæður sem eru hægt og sígandi að verða óásættanlegar,“ segir Böðvar.
„Ég er alveg sannfærður um, því þetta er allt á því stigi og það miklar afleiðingar, að ég held að þetta muni hafa talsvert mikil áhrif allavega í Skandinavíu og vonandi víðar.“
