Vegagerðin vill láta fjarlægja klettinn við Krýsuvíkurveg þar sem þrjú ungmenni létu lífið í bílslysi aðfaranótt mánudags. Banaslys varð á nákvæmlega sama stað fyrir tæpum tveimur áratugum. Rannsóknarnefnd umferðarslysa kallaði þá eftir varúðarskiltum, sem Vegagerðin telur sig hafa orðið við.
Tæp vika er frá banaslysinu á Krýsuvíkurvegi, þar sem þrjú ungmenni létust eftir að bíll þeirra hafnaði á hraunkletti utan vegar. Talið er að bíllinn hafi verið á yfir 220 kílómetra hraða, en íbúar í grennd við slysstaðinn hafa ítrekað varað við ofsaakstri á veginum.
Annað banaslys á sama stað
Árið 2007 lést ökumaður bifhjóls þegar hjólið fór út af og rakst á sama hraunklett. Samkvæmt niðurstöðu rannsóknarnefndar umferðarslysa var ökumaðurinn á ofsahraða og missti stjórn á hjólinu þegar hann tók fram úr á óbrotinni línu. Auk þess var hann undir áhrifum fíkniefna.
Rannsóknarnefndin lagði til að hámarkshraði á Krýsuvíkurvegi yrði lækkaður úr 90 í 70 og taldi að vegmerkingum á slysstað væri ábótavant, þar sem ekki væri varað við hættulegum beygjum og hæðum. Heimildin fjallaði um niðurstöðu rannsóknarnefndarinnar.
Í svari frá Vegagerðinni við fyrirspurn fréttastofu RÚV segir að radíus beygjunnar kalli ekki á skilti sem gefi til kynna varasama beygju fram undan. Það sé þó til athugunar, enda leggi Vegagerðin mikla áherslu á að fyrirbyggja manntjón.
Bætt hafi verið við skilti um leiðbeinandi hraða í beygjunni, 70 kílómetra á klukkustund, og merki um hættuleg vegamót, þar sem Bláfjallaafleggjarinn kemur inn á veginn.
Rétt er að geta þess að ef ekið er samkvæmt merkingum og í samræmi við lög og hámarkshraða má telja ólíklegt að þessi vegakafli geti talist hættulegur.
