Héraðsdómur Oslóar hefur úrskurðað að innheimtufyrirtæki hafi ekki haft heimild til að leggja á aukaleg gjöld vegna bílastæðanotkunar. Formaður Neytendasamtakanna telur að hægt sé að heimfæra norska dóminn upp á Ísland.
Norsku neytendasamtökin höfðuðu hópmálsókn gegn innheimtufyrirtækinu Riverty sem sá um innheimtu fyrir ýmis bílastæðafyrirtæki og höfðu betur. Fyrirtækið hafði rukkað meira fyrir innheimtu reikninga en það kostaði að gefa þá út. Það er óheimilt samkvæmt norskum lögum.
Segja dóminn geta verið fordæmisgefandi
Félag íslenskra bifreiðaeigenda telur að dómurinn gæti verið fordæmisgefandi á Íslandi því hann byggi á reglum sem eigi sér hliðstæðu í íslensku regluverki.
Breki Karlsson, formaður Neytendasamtakanna, telur einnig að íslensku vangreiðslugjöldin séu sambærileg við norsku innheimtuna og að dómurinn gæti verið fordæmisgefandi á Íslandi.
„Þar af leiðir að þá ættu íslenskir bílastæðanotendur rétt á endurgreiðslu af ofteknum vangreiðslugjöldum eins og var verið að dæma í Noregi,“ segir hann.
Breki slær þó þann varnagla að norska úrskurðinum gæti verið áfrýjað.
Þurfa að endurgreiða norskum bílstjórum
Í Noregi þarf Riverty að endurgreiða fólki ólöglegu gjaldheimtuna. Upphæðin nemur tæpum 300 milljónum norskra króna – tæplega fjórum milljörðum íslenskra króna.
„Þetta er eitthvað sem við viljum skoða hér á Íslandi og höfum bent stjórnvöldum á margsinnis, og nú að verða í mörg ár, að þessi vangreiðslugjöld eru eitthvað sem ætti ekki að líðast hér á Íslandi. Ekki frekar en í Noregi.“
Breka finnst að íslensk stjórnvöld ættu að grípa inn í – til dæmis með því að Neytendastofa kanni hvort aukastöðugjöld séu sanngjörn. Þá segir hann að Fjármálaeftirlitið ætti að fylgjast með hvort fyrirtæki fari að innheimtulögum.
„Þarna verða þessar tvær stofnanir að vinna saman og skýra þessi mál. Við hljótum að geta gert þá kröfu.“
Að öðrum kosti þurfi íslenskir neytendur að fara í svipað mál og í Noregi. „Það er kostnaðarsamt fyrir alla og við viljum komast hjá því ef það er að einhverju leyti mögulegt.“
