Starfsmönnum íslenskra orkufyrirtækja hefur fjölgað um 173 á síðastliðnum átta árum.
Þetta kemur fram í svari Daða Más Kristóferssonar fjármála- og efnahagsráðherra við fyrirspurn Þorsteins B. Sæmundssonar, varaþingmanns Miðflokksins, um þróun starfsmannafjölda og launakostnaðar Landsvirkjunar, Landsnets og Rariks frá árinu 2018.
Starfsmönnum fjölgað um 173
Í svarinu má sjá að starfsmönnum Landsvirkjunar fjölgaði um 67 á tímabilinu, starfsmönnum Landsnets um 41 og Rariks um 65.
„Það kom mér dálítið á óvart hve fjölgunin er mikil, sérstaklega hjá Landsvirkjun,“ segir Þorsteinn, aðspurður.
Í svarinu kemur einnig fram að launakostnaður Landsvirkjunar hafi hækkað um 9,5 milljónir dollara, eða um 1.210 milljónir króna, á tímabilinu, Landsnets 6,2 milljónir dollara, eða um 789 milljónir króna, og Rariks 2.580 milljónir íslenskra króna.
Tekið skal fram að Landsvirkjun og Landsnet gera upp í bandaríkjadölum og því geta gengissveiflur haft áhrif á þróun launakostnaðar á milli ára í þeirra bókhaldi, á meðan Rarik gerir upp í íslenskum krónum.
Ástæðurnar óljósar
Svar Daða kveður aðeins á um þróunina sjálfa og er þar engin ástæða gefin fyrir fjölguninni.
„Eru verkefnin svo miklu fleiri? Ég get ekki varist því að akkúrat þessi tími frá 2019 til dags dato er einmitt tíminn sem orkupakki 3 var samþykktur og tekinn inn í íslenskan rétt,“ segir Þorsteinn.
„Honum fylgdu alls konar skavankar og kröfur og það er spurning hvort þessi fjölgun sé tengd samþykkt orkupakkans.“
Þorsteinn segir að ekki hafi verið ráðist í neinar stórar framkvæmdir á tímabilinu svo ástæða þróunarinnar sé því nokkuð óljós.
„Þetta er það sem við Miðflokksmenn höfum verið að benda á, báknið er að bólgna út og þarna er dæmi úr óvæntri átt,“ segir hann.
