Starfsfólk Matvælastofnunar hefur orðið fyrir óvenjulega miklum hótunum og áreiti að undanförnu. Dæmi eru um að starfsfólk hafi sett upp öryggiskerfi á heimilum sínum vegna þessa.
Hrönn Ólína Jörundsdóttir forstjóri MAST segir komið hafa til álita hvort starfsfólk þurfi neyðarhnappa. Sumt starfsfólk óttist um börn sín vegna hótana og áreitis. Í viðtali í Morgunútvarpinu segir Hrönn atvikin tengjast afskiptum MAST af dýrahaldi og beitingu þvingunarúrræða þar sem brotið er á velferð dýra.
Augljós tilgangur þeirrar háttsemi sé að hræða starfsfólk og ógna því í þeirri von að það hafi áhrif á framgang mála en stofnunin láti ekki undan slíkum þrýstingi. Allar hótanir gagnvart starfsfólki séu litnar alvarlegum augum og séu umsvifalaust kærðar til lögreglu.
„Þetta er sem betur fer ekki algengt en þetta er ekki nýtt. Við höfum í gegnum tíðina þurft að bregðast við og beinlínis kæra hótanir og jafnvel ofbeldi,“ segir Hrönn.
Dýr aldrei fjarlægð að ástæðulausu eða af léttúð
Hún segir mikla umræðu hafa skapast á samfélagsmiðlum að undanförnu vegna tiltekins máls þar sem starfsmenn stofnunarinnar séu nafngreindir og myndir birtar af þeim. Dæmi séu um að fjölskyldum starfsmanna hafi borist ógnandi skilaboð vegna málsins. Áreitið sé ekki að berast úr mörgum áttum heldur frá sömu einstaklingum.
MAST megi ekki tjá sig um einstaka mál og því sé málflutningur þeirra sem kjósi að ræða mál sín á opinberum vettvangi gjarnan einhliða. Hrönn bendir á að ákvarðanir um að fjarlægja dýr af heimilum séu teknar af teymi starfsmanna, ekki af einstaklingum, og aldrei af léttúð eða að ástæðulausu.
„Ef málin eru þannig að þau eru mjög alvarleg eða eigandinn hefur ekki brugðist við athugasemdum okkar um að bæta úr þá er þetta síðasta úrræðið okkar. Að beinlínis fjarlægja dýrin úr aðstæðunum, vörslusvipta eigandann og reyna þá að koma dýrunum fyrir á betri stað.“
