„Sonur minn var því miður ekki sá eini“ - DV

„Kynferðisofbeldi gegn börnum er mjög persónulegt mál fyrir mig. Sonur minn dó sem afleiðing af kynferðisofbeldi sem hann var beittur sem unglingur.

Sonur minn var því miður ekki sá eini, allt of mörg hafa látist vegna beinna áhrifa slíks ofbeldis“

segir Sigurþóra Bergsdóttir, varaþingmaður og fyrrverandi framkvæmdastjóri Bergsins headspace, í grein sinni á Vísi.

Sonur hennar, Bergur Snær Sigurþóruson, tók eigið líf 19 ára gamall í mars árið 2016 eftir að saksóknari felldi mál gegn meintum geranda hans niður. Gerandinn hlaut dóm fyrir brot gegn öðrum drengjum. Í kjölfarið stofnaði Sigurþóra Bergið headspace, þar sem ungmennum er mætt á þeirra forsendum og ráðgjöf og samtal við fagaðila í boði.

Sigurþóra segir kynferðisofbeldi gegn börnum lífshættulegt. Skömmin sé stærsti fylgifiskur ofbeldisins og hún geti verið óbærileg.

„Ein af mínum stærstu lexíum í minni vegferð er að við verðum að koma til móts við fólk þar sem það er statt. Okkar fyrstu viðbrögð eru oft að vilja gera eitthvað, redda málum og senda fólk í meðferðir til að lækna það. En það er ekki alltaf rétta leiðin.“

Segir Sigurþóra ekki hægt að ætlast til þess að börn eða fullorðnir sem lenda í ofbeldi taki alla ábyrgð á sinni líðan eða segi frá eftir pöntun. Samfélagið þurfi frekar að styðja, hlusta og gefa þolendum ráðrúm til að stjórna sinni eigin ferð.

„Það þarf ekki alltaf að hlaupa upp til handa og fóta, við læknum ekki allt í einu. Við þurfum að vera til staðar, gefa rými og leyfa fólki að hreyfa sig á sínum hraða. Þannig hjálpum við fólki að ná utan um skömm og sára atburði, svo það geti heilast á eigin forsendum.“

Sigurþóra segir réttarkerfið ekki uppsett til að takast á við þessi mál, það bregðist í að færa ábyrgðina þangað sem hún á heima og verja þolendur, sem eykur oft bara á skömm þeirra. Enn hafi okkur ekki tekist að byggja upp kerfi sem tekur nægilega vel utan um þau sem verða fyrir slíkum brotum.

Grein Sigurþóru er hluti af ÉG LOFA átaki Barnaheilla, sem lesa má um hér.

Sjálf lofar hún að:

„Ég lofaði syni mínum að honum látnum að gera allt sem ég get til að vinna að því að við gerum þetta betur, og ég lofa að halda því áfram.

Ég lofa að hlusta og taka eftir.

Ég lofa að vinna að betri kerfum.

Ég lofa að halda áfram að berjast fyrir meira réttlæti fyrir þolendur kynferðisofbeldis.

Ég lofa að styðja við allt sem hindrar að börn lendi í slíku.

Að lokum vil ég árétta að flest fórnarlömb kynferðisofbeldis lifa það af og það er svo sannarlega hægt að lifa góðu og hamingjuríku lífi þrátt fyrir slík áföll.

En það gerist ekki að sjálfu sér, til þess þarf fólk að fá stuðning og hjálp, sem er til staðar ef við byggjum réttu brýrnar.“

Ef ein­stak­ling­ar glíma við sjálfs­vígs­hugs­an­ir er bent á Hjálp­arsíma Rauða kross­ins 1717 og netspjall Rauða krossins 1717.is. Opið allan sólarhringinn. Einnig má hafa sam­band við Píeta-sam­tök­in sem veita ókeyp­is ráðgjöf í síma 552-2218, allan sólarhringinn. Netspjall Heilsuveru þar sem svarar hjúkrunarfræðingur er líka opið frá kl.8-22 alla daga. Fyrir þau sem misst hafa ástvin í sjálfsvígi má fá stuðning í sorg hjá Sorgarmiðstöð og hjá Pieta samtökunum.