Páll Vilhjálmsson skrifar:
Aðeins tveir tvær niðurstöður geta komið úr þjóðaratkvæðagreiðslu um ESB-umsókn, já eða nei. Þorgerður Katrín utanríkisráðherra ber fram tillögu á alþingi um þjóðaratkvæði. Í greinargerð með tillögunni segir:
Ákvæði 123. gr. kosningalaga kveður á um að til þess að spurning eða tillaga sem er borin upp í þjóðaratkvæðagreiðslu teljist samþykkt þarf hún að hafa hlotið meiri hluta gildra atkvæða í atkvæðagreiðslunni, sbr. 2. mgr. 104. gr. Niðurstaða þjóðaratkvæðagreiðslu skv. 2. mgr. 2. gr. kosningalaga er ráðgefandi, sbr. 3. mgr. 123. gr. laganna, en hún hlýtur þó eins og aðrar ákvarðanir sem lagðar eru í dóm þjóðarinnar að hafa mikið pólitískt gildi.
Töluvert er rætt um hvað já þýði fyrir framhald málsins en ekkert er spáð í hvaða afleiðingar nei hefur í för með sér. Það er ekki svo að aðeins ein niðurstaða hafi ,,mikið pólitískt gildi." Bæði já og nei hljóta að fá pólitískar afleiðingar. Greinargerð Þorgerðar Katrín útskýrir ekki hvaða pólitískt gildi nei hefur.
Þorgerður Katrín kemst ekki upp með það, án afleiðinga, að valda stjórnmálaóvissu hér á landi í hálft ár, sniðganga reglur um samráð við þing og þjóð, setja sveitarstjórnarkosningar í uppnám og henda meira en hálfum milljarði króna í þjóðaratkvæðagreiðslu til að fá já en sitja uppi með nei.
Verði svarið nei - að því gefnu að þjóðaratkvæðagreiðslan verði haldin - er lokið erindi Viðreisnar og Þorgerðar Katrínar í íslensk stjórnmál. Flokkurinn var stofnaður fyrir tíu árum um eitt mál, ESB-aðild. Segi þjóðin nei í þjóðaratkvæðagreiðslu um ESB-umsókn eru ekki lengur pólitísk rök fyrir aðild Þorgerðar Katrínar og Viðreisnar að ríkisstjórn Íslands.
Mun Þorgerður Katrín gefa út yfirlýsingu að hún segi sig frá þátttöku í ríkisstjórn fari svo að þjóðaratkvæðagreiðsla um ESB-umsókn verður haldin og niðurstaðan verði nei? Þjóðin á kröfu um skýrt og ótvírætt svar.
