Tinna Bessadóttir, hönnuður og viðburðarstjóri, sakar Hafnarfjarðarbæ um að hafa tekið yfir Álfahátíðina í Hellisgerði, árlegan viðburð og hugverk sem hún eigi réttinn að og hafi skapað frá grunni. Hún sakar bæjaryfirvöld um óheiðarleika.
„Nafnið Álfahátíð í Hellisgerði er það sem ég bý til“
Síðustu tæplega tíu ár hefur álfum verið gert hátt undir höfði á árlegri Álfahátíð sem haldin er í Hellisgerði í Hafnarfirði.
Tinna Bessadóttir, hönnuður og viðburðarstjóri, segir hugmyndina að hátíðinni hafa orðið til þegar hún sat nám í viðburðastjórnun.
„Ég var búin að ganga með þessa hátíð í maganum í svona ár að mig langaði að gera einhverja barnahátíð og hafa þetta ókeypis. Og svo þróaðist hún áfram,“ segir Tinna.
Og nafnið, Álfahátíð í Hellisgerði, kemur frá þér?
„Jú, nafnið Álfahátíð í Hellisgerði er það sem ég bý til.“
Fjölskyldan unnið launalaust í hundruði klukkutíma
Tinna segir ómælda vinnu hafa farið í að skapa og byggja upp hátíðina síðustu ár. Hún og fjölskylda hennar hafi unnið að baki brotnu, launalaust að stórum hluta, til þess að hátíðin gæti orðið að veruleika. Hafnarfjarðarbær hafi í raun enga aðkomu haft að henni. Hún hafi þó fengið styrki frá bænum sem hafi farið í að greiða skemmtikröftum.
„Fjölskyldan mín hefur unnið þarna alveg í hundruði klukkutíma í gegnum árin, alveg ókeypis og ekki fengið neitt greitt fyrir. Bæði foreldrar mínir, bræður míninr, börnin mín og stjúpbörn hafa öll verið að vinna þarna fyrir mig launalaust og ég líka. En í rauninni er það gleðin sem er búið að drífa okkur áfram allan þennan tíma.“
Bauð Hafnarfjarðarbæ að kaupa verkefnið
Tinna ákvað að hætta með hátíðina árið 2023 og árið á eftir var engin hátíð.
Hafnarfjarðarbær ákvað að endurvekja hátíðina í fyrra, undir sama nafni, án aðkomu Tinnu.
Tinna segist hafa verið undrandi á þessu útspili bæjarins, ekki síst vegna þess að myndir af börnum Tinnu, sem teknar voru á hátíðinni, hafi verið notaðar í auglýsingaskini. Hún hafi því ákveðið að senda athugasemd á bæjarstjóra og viðburðarstjóra, þar sem hún spurði meðal annars hvort staðan væri orðin svo, að hún þyrfti að huga að því að fá einkaleyfi á hátíðinni og hugverkinu.
„Og fékk voðalega skrýtin svör um að þau vissu það ekki. Vissu ekki að ég ætti hana, eða ég hefði stofnað þetta. Og svona máluðu sig svolítið eins og vitlaus,“ segir Tinna.
Það hafi svo verið í mars á þessu ári þegar hún hafi komist að því að Hafnarfjarðarbær hafi sótt um einkaleyfi á nafninu Álfahátíð í Hellisgerði.
„Ég var bara í sjokki og hafði samband við Hugverkastofu og fékk þær upplýsingar að frestur til að mótmæla hefði runnið út deginum áður. Ég hafði samband við lögfræðistofu og þau eru sammála mér um að ég eigi þessa hátíð og miðað við þau gögn sem ég er með þá liggur það alveg í augum uppi að þetta er bara hugverkaþjófnaður.“
Hún hafi í kjölfarið fundað með bænum þar sem hún bauð þeim að kaupa verkefnið. Því hafi ekki verið svarað.
„Mér finnst þetta náttúrlega bara gríðarlega óheiðarlegt og öskra leti og léleg vinnubrögð. Ég vil að þau kaupi af mér þessa hátíð, kaupi af mér þetta verkefni. Ef þú sérð listaverk eftir einhvern þá tekurðu það ekki eða reynir að gera alveg eins, þú kaupir það bara.“
„Ágreining um hátíðina þarf að ræða á réttum vettvangi“
Í yfirlýsingu frá Hafnarfjarðarbæ kemur fram að hátíðin byggi á menningararfi um álfa og huldufólk. Álfahátíðir hafi verið haldnar í gegnum árin í Hellisgerði, enda sé þar talið eitt þéttbýlasta svæði huldufólks á landinu.
„Þannig var haldin álfahátíð þegar árið 2014 af öðrum aðila með styrk frá bænum. Ágreining um hátíðina þarf að ræða á réttum vettvangi studdum gögnum. Okkur er annt um menningar- og viðburðalíf í Hafnarfirði. Þetta er barna- og fjölskylduhátíð sem á sér langa sögu hér í Hellisgerði.“
