„Það er afar jákvætt að ráðherra hafi lokið við reglugerðarbreytinguna enda hefur verið eftir henni kallað frá síðasta sumri. Við sáum að Norðmenn voru minna hikandi og luku við þessa breytingu árið 2019. Hér á landi hafa söluaðilar beðið í ofvæni eftir þessu og er mikið létt enda er eftirspurn eftir rafbílum töluverð og uppi þörf á raunhæfum valkostum í tilviki örlítið þyngri bíla, í ljósi þyngdar rafhlöðu og tengds búnaðar.“
Þetta segir Benedikt S. Benediktsson framkvæmdastjóri Bílgreinasambandsins í samtali við Morgunblaðið.
Innviðaráðherra hefur undirritað reglugerðarbreytingu sem rýmkar heimildir ökumanna með almenn ökuréttindi, þ.e. í B-flokki, sem verður nú heimilt að aka rafbílum og bílum knúnum óhefðbundnu eldsneyti sem vega án eftirvagns allt að 4.250 kg í stað 3.500 kg áður, enda hafi þeir haft slík réttindi í minnst tvö ár. Breytingin tekur aðeins til sendibíla en ekki svokallaðra „strumpastrætóa“ sem þó hefur verið kallað eftir.
Benedikt segir að næsta skref hjá ráðherra ætti að vera að takast á við enn frekari breytingar sem voru gerðar á vettvangi ESB á síðasta ári þar sem útvíkkun B-ökuréttinda sé látin ná til fleiri ökutækja en þeirra sem ætluð séu til vöruflutninga.
„Þær breytingar eru til skoðunar hjá EFTA-ríkjunum en við höfum haft fréttir af því að þegar séu hafin samtöl innan ESB sem eiga að leiða til þess að ökumenn svokallaðra strumpastrætóa og fleiri bíla sem ganga fyrir rafmagni eða öðrum óhefðbundnum orkugjöfum njóti sambærilegra réttinda. Við þökkum ráðherra fyrir en hvetjum hann um leið til að slá ekki slöku við í þessum efnum. Það er afar mikilvægt að breytingar á regluverki tefji ekki fyrir tækniframförum og orkuskiptum í samgöngum,“ segir Benedikt.
Á vef innviðaráðuneytisins segir að með breytingunni sé verið að jafna stöðu rafbíla og bíla knúinna óhefðbundnu eldsneyti í vöruflutningum. Fyrirtæki og einstaklingar geti nú nýtt sér rafknúna sendibíla án þess að þurfa að bera kostnað af ökunámi vegna meiraprófs.
„Það er mikilvægt að regluverkið styðji við fyrirtæki og einstaklinga sem vilja fjárfesta í vistvænni ökutækjum. Nú geta ökumenn með almenn ökuréttindi ekið þyngri rafknúnum bílum og nýtt burðargetu þeirra til jafns við eldri og meira mengandi bíla. Þetta er því mikilvægt skref í að hvetja til orkuskipta,“ er þar haft eftir Eyjólfi Ármannssyni innviðaráðherra.
