RÚV neitar að leiðrétta frétt um meinta hótun í garð Helga Seljan

Í frétt RÚV segir meðal annars: „Berlingske hefur eftir Helga að Páll Steingrímsson hafi að minnsta kosti í þrígang sent honum hótanir í tengslum við umfjöllun hans um Samherja, sem og öðrum blaðamönnum.“

Skipstjóri hafnar ásökunum og krefst leiðréttingar

Páll Steingrímsson birti í kjölfarið grein þar sem hann hafnar því alfarið að hafa nokkru sinni hótað Helga Seljan eða öðrum blaðamönnum. Hann fór fram á að frétt RÚV yrði leiðrétt en þeirri beiðni hefur ekki verið sinnt.

Samkvæmt upplýsingum málsins hefur RÚV hvorki leiðrétt fréttina né boðið skipstjóranum að tjá sig í viðtali til að koma á framfæri andsvörum sínum. Í frétta- og blaðamennsku er almennt litið svo á að þeir sem sæta ásökunum eigi rétt á að svara þeim á sama vettvangi.

Gagnrýni innan RÚV eftir birtingu fréttar

Fréttin var birt á laugardagskvöldi eftir að vakstjórar höfðu lokið störfum þann dag. Heimildir Nútímans herma að óánægja hafi komið upp innan RÚV skömmu síðar.

Samkvæmt þeim heimildum á Heiðar Örn Sigurfinnsson fréttastjóri að hafa gagnrýnt birtingu fréttarinnar í viðurvist annarra starfsmanna og talið að óheppilegt hefði verið að birta hana utan hefðbundins vinnutíma ábyrgra stjórnenda.

Umdeild umfjöllun dansks blaðamanns

Umfjöllunin sem RÚV studdist við er eftir danska blaðamanninn Emil Olsen sem skrifaði nýlega tvær greinar um íslensk málefni í Berlingske. Önnur þeirra fjallaði um einstaklinga í íslenskri fjölmiðlaumræðu en hin um sjávarútveg á Íslandi, sem þar var lýst á gagnrýninn hátt.

Greinarnar vöktu töluverð viðbrögð, meðal annars innan Danmerkur, þar sem birtust andsvör við nálgun og efnistökum blaðamannsins.

Samkvæmt upplýsingum sem gengið hafa á meðal íslenskra tengiliða sagðist Emil Olsen um tíma ekki hafa haft aðgang að tölvupósti sínum hjá Berlingske þar sem vinnubrögð hans væru til skoðunar hjá yfirstjórn miðilsins.

Í kjölfarið birtist þó önnur grein um íslenskan sjávarútveg eftir annan blaðamann miðilsins. Þar var haft eftir yfirmanni erlendra frétta að áhugi á málinu tengdist meðal annars umræðu um mögulega aðild Íslands að Evrópusambandinu og væntanlegu þjóðaratkvæði.