Langnesingar eru óánægðir með samráðsleysi Vegagerðarinnar þegar kemur að útboði á áætlunarflugi frá Akureyri til Vopnafjarðar og Þórshafnar. Til stendur að fækka flugferðum úr fimm ferðum á viku niður í þrjár.
Útboð í áætlunarflugið var auglýst 18. maí og bárust tilboð frá bæði Icelandair og Norlandair. Bæði tilboðin voru yfir kostnaðaráætlun. Ekkert hefur heyrst frá Vegagerðinni, sem sér um útboðið.
Hilmar Stefánsson, forstöðumaður almenningssamgangna hjá Vegagerðinni, segir í samtali við fréttastofu að báðum tilboðum hafi verið hafnað enda langt yfir kostnaðaráætlun.
Flugfélögunum hafi verið boðið til samningsviðræðna og þau hafi fundað einu sinni.
Fer fram á að Vegagerðin endurskoði ákvörðun sína
Byggðaráð Langanesbyggðar segir það veruleg vonbrigði að skerða eigi einu almenningssamgöngurnar til svæðisins og að ekkert samráð hafi verið haft við sveitarfélagið. Niðurskurður í flugsamgöngum sé þungt högg og í hróplegu ósamræmi við markmið áætlana um eflingu byggðar.
Í bókun byggðarráðsins segir:
„Byggðarráð Langanesbyggðar lýsir verulegum vonbrigðum með þessa miklu skerðingu á einu almenningssamgöngunum sem standa íbúum sveitarfélagsins til boða [...] Niðurskurður í flugsamgöngum er þungt högg í þeirri baráttu og í hróplegu ósamræmi um markmið opinberra áætlana um eflingu byggðar.
Byggðarráð lýsir einnig vonbrigðum með upplýsinga- og samráðsleysi Vegagerðarinnar við ákvörðunartökuna. [...] Byggðarráð fer fram á að Vegagerðin endurskoði ákvörðun sína áður en gengið verður frá samningum um flugleiðina.“
Í skýrslu Vegagerðarinnar frá því í nóvember 2025 kemur fram að ríkið hafi greitt um 107 þúsund krónur með hverjum farþega milli Akureyrar, Vopnafjarðar og Þórshafnar. Þá sé ótalið loftbrú sem margir farþega eiga rétt á og nýta sér. Sé hún tekin inn er upphæðin 111.000 krónur.
Fyrir tímabilið september 2024 til janúar 2025 var mesta meðalsætisnýting um 18%. Hilmar segir að stærsta ástæðan fyrir fækkun flugdaga sé döpur nýting á þessu flugi. Mannfjöldaspá gerir ráð fyrir 16,5% fjölgun íbúa á svæðinu á næstu 10 árum en þrátt fyrir það er það mat Vegagerðinnar að meðalsætanýting verði mest um 21%.
