Reykjavík hefur vaxið gríðarlega á örfáum árum og ósköp eðlilegt er að slíkum vexti fylgi einhverjir vaxtaverkir. Á tíu árum hafa bæst við íbúar sem jafngilda því að bætt hafi verið einu stykki Akureyri eða einu stykki Garðabæ í höfuðborgina. Innviðir hafa setið á hakanum en núna verður að taka á í þeim efnum. Suðurlandsbrautin er eitt þeirra atriða sem verður að skoða, sérstaklega á framkvæmdatímanum. Pétur Marteinsson, oddviti Samfylkingarinnar í Reykjavík, er gestur Ólafs Arnarsonar í hlaðvarpi Eyjunnar.
Hér er hægt að hlusta á brot úr þættinum:
Pétur Marteinsson - 3
„Mér hefur fundist Reykjavíkurborg vera systematískt töluð niður. Mér finnst það leiðinlegt. Ég held að þetta sé ekki nákvæmlega upplifunin okkar. Auðvitað þarf að taka til í leikskólamálum. Það hefur eitthvað klikkað þar. Umferðin er eins og hún er út af því að okkur er að fjölga. Fólk setur þetta náttúrlega ekki í samhengi almennt en á tíu árum hefur okkur fjölgað um 24 þúsund manns bara í Reykjavík.
Það er eins og að setja rúmlega Akureyri og rúmlega Garðabæ inn í Reykjavík á tíu árum. Fyrirtækjum hefur aldrei fjölgað eins mikið. Á 15 árum hefur 50% aukning fyrirtækja og störfum hefur fjölgað á sex, sjö árum um 35%. Þetta er rosalegur vöxtur í einni borg. Í þessu vaxtarskeiði, þetta er bara eins og við séum unglingar.“
Þetta eru bara vaxtarverkir sem við erum að upplifa.
„Það eru vaxtarverkir og það verður að segjast eins og er að innviðirnir hafa aðeins setið á hakanum. Viðhald á húsnæði og íþróttamannvirkjum og jafnvel göngustígum, sérstaklega í eldri hverfunum. Nú er Breiðholtið orðið eldra hverfi og göngustígarnir eru ekki í góðu standi. En það er út af þessum vexti og við sjáum bara fyrirtæki sem eru í svona örum vexti, að eftir það þarf að taka til. Ég held að við séum á þeim stað núna að þó að Samgöngusáttmálinn sé kannski ekki að klárast á næsta ári, þetta mun taka tíma og þetta verður alveg sársaukafullt á meðan. En strax á næsta kjörtímabili munum við finna mun á umferðinni.“
Já, það er ekki hægt að tala um Samgöngusáttmálann öðruvísi en að draga fram Suðurlandsbrautina. Það er mikil óánægja margra með áform um að fækka akreinum á Suðurlandsbrautinni. Það er í raun og veru ekki hluti af Samgöngusáttmálanum. Það er hlutur sem Reykjavík stýrir sem skipulagsmál og ákveður að fara þessa leið.
Flest hin framboðin segja: „Heyrðu, það þarf að skoða þetta, það þarf aðeins að skoða þetta og staldra við með það.“ Bæði þeir sem eru á móti samgöngusáttmálanum og þeir sem eru hlynntir honum, Viðreisn, til dæmis, hlynnt samgöngusáttmálanum en setur spurningarmerki við þessa útfærslu á Suðurlandsbrautinni. Þarf ekki eitthvað að gera? Þarf ekki að endurskoða þetta?
„Jú, það verður samt að setja þetta í samhengi. Þetta kannski verður aðeins of langt svar og kannski dálítið kerfislegt. Það verður að setja í samhengi við sáttmálann í heild. Vegna þess að það var fyrirséð fyrir 15 árum síðan að umferðin myndi þyngjast, að okkur væri að fjölga. Það var fyrirséð. Sveitarfélögin á höfuðborgarsvæðinu, öll sveitarfélögin, koma sér saman og fá ríkið með sér í að reyna að finna lausn á þessu. Og það eru allir helstu sérfræðingar í samgöngumálum og uppbyggingu borga sem koma að þessu, bæði innlendir og erlendir. Niðurstaðan er Samgöngusáttmálinn sem öll sveitarfélögin í kringum höfuðborgarsvæðið skrifa undir og þetta eru meira og minna Sjálfstæðismenn. Og ríkið. Þetta er stórkostlegt afrek að fá …“
Allir bæjarstjórarnir sem skrifuðu undir samgöngusáttmálann 2019, allir nema borgarstjórinn í Reykjavík, voru Sjálfstæðismenn.
„Þá er Dagur sem skrifaði undir sem borgarstjóri. Hann var eini Samfylkingarmaðurinn þar. En síðan koma kosningar og þá er tekinn upp samningurinn alveg sama umræða og er núna. Og 2024 er skrifað aftur undir samkomulag og aftur eru það öll sveitarfélögin í kringum höfuðborgarsvæðið og ríkið, og þá er Einar Þorsteinsson borgarstjóri. Þannig að enginn Samfylkingarmaður, reyndar er Regína bæjarstjóri í Mosfellsbæ og hún er í sjöunda sæti hjá okkur. Lykilmanneskja á okkar lista og algjörlega frábær og það er eina Samfylkingartengingin. Það er svo klassískt, pólitík er svo skrýtin og ég er náttúrlega nýr í pólitík og vonandi verð ég aldrei alveg svona pólitíkus vegna þess að það er svo margt sem mér leiðist. Núna, fyrir kosningar, þá er talið vinsælt að tala niður Samgöngusáttmálann og að það þurfi að breyta og taka hann upp og það er svo hættulegt. Ég mun koma að Suðurlandsbrautinni á eftir, ég er ekki að gleyma því. Það er svo hættulegt að rífa þetta plagg eða henda þessu í ruslið eða ætla að byrja upp á nýtt, setja fleiri nefndir, fleiri sérfræðinga. Það mun aftur tefja þetta, alveg eins og eftir 2019 samkomulagið, þá var það tekið upp og það tafðist um tvö ár. Tafir alltaf. Þess vegna erum við með þessa umferð eins og hún er og þess vegna eru ekki almenningssamgöngur orðnar betri heldur en þær í raun eru.
Þannig að þetta er svo mikilvægt. Það er fullkomlega óábyrgt að mínu mati að vera að taka upp samkomulagið vegna þess að við munum ekkert fá svona samkomulag aftur, þetta mun tefja allt, við verðum lengur í umferðinni og meiri tafir og meiri mengun. Það er augljóst.“
Ég er algjörlega sannfærður um það að ef menn rífa þetta plagg og ætla að fara að nálgast þetta úr einhverri annarri átt, þá erum við að tala um 10-20 ára töf.
„Gæti verið, það er aðeins mismunandi eftir flokkum hversu mikið, en bara að taka hann upp, vegna þess að við megum ekki gleyma því, það er umferð líka í Garðabæ, það er líka umferð í Kópavogi og Hafnarfirði, fólk er jafn lengi á leiðinni þar. Á hverjum degi koma 40. 000 manns úr nágrannasveitarfélögum að vinna í Reykjavík og ég segi bara velkomin, þetta er bara frábært að fá ykkur.“
Á rétt tæplega 40.000 bílum.
„Já, á 40.000 bílum. Það eru 40. 000 bílar sem koma inn í borgina úr hinum sveitarfélögunum og ég segi bara velkomin, frábært, það er gott að vera í Reykjavík og öll velkomin. En það er ástæðan fyrir að öll sveitarfélögin koma sér saman um að finna leið og þetta er leiðin og einhverjir sem eru með Excel-skjal heima hjá sér og finna einhverjar aðrar lausnir, við skulum frekar treysta því sem er búið að vera að vinna að í tíu ár.
Ókei, gott og vel. Nú skulum við koma að, ég er ekki að reyna að bægja frá spurningunni. Hún er aðeins flókin, Suðurlandsbrautin. Ég fór og hitti hagsmunasamtök þarna í kringum Suðurlandsbrautina á fundi um daginn. Það var ekki sett út á Samgöngusáttmálann sem slíkan, það var ekki sett út á borgarlínu sem slíka, það var aðeins sett út á útfærsluna. Það var aðallega með bílastæði í huga. Aðrir flokkar hafa sagt, það er galið að vera með eina akbraut í sitthvora áttina og Borgarlínu í miðjunni. Þau vilja hafa tvær akbrautir, akreinar í báðar áttir. Það þýðir að annaðhvort verðum við að taka fleiri bílastæði eða fara langt inn í Laugardalinn. Og það gæti meira að segja haft áhrif á þjóðarhöllina og þetta er alveg mjög þröngt þarna. Og ég segi, það skipulag, og það er alveg rétt hjá þér að skipulagsvaldið er hjá sveitarfélögunum og öll sveitarfélögin eru að glíma við þetta, þau eru að skipuleggja og það munu koma fleiri vandamál upp, þau eru að skipuleggja hvern og einn bút. Ég er ánægður með þessa útfærslu en það sem ég deili með fasteignaeigendum og rekstrinum á Suðurlandsbraut er að á framkvæmdatíma, og þetta var aðalatriðið hjá þeim, á framkvæmdatíma, ef það þarf að loka götunni í þrjú til fimm ár, þá mun það bitna á rekstrinum og verðmæti fyrirtækjanna og fasteignanna á staðnum. Þetta er eitthvað sem við verðum að taka mjög alvarlega. Þegar framkvæmdaáætlun er gerð þá verður að setjast niður með hagsmunaaðilum og segja: Ókei, hér er ein útfærsla. Það verður mikið lokað á virkum dögum á þessum tíma en við verðum að finna einhverja leið fram hjá þessu. Þangað til við erum búin að gera framkvæmdaáætlun og vera í samtali við fyrirtækin á Suðurlandsbraut þá vil ég ekki útiloka að þetta sé besta lausnin sem er búið að kynna.“
Hægt er að hlusta á hlaðvarpið í heild sinni hér:
Einnig er hægt að hlusta á Spotify.
