Flestir sem brautskráðust með stúdentspróf árið 2025 útskrifuðust af óskilgreindum eða opnum brautum. Það var í fyrsta sinn sem náttúrufræðibraut var ekki fjölmennasta brautin meðal brautskráðra stúdenta í tæpan áratug eða frá 2016.
Þetta kemur fram í tilkynningu frá Hagstofu Íslands. Þar segir að nærri þriðjungur brautskráðra stúdenta hafi útskrifast af svokölluðum „öðrum“ námsbrautum, þar eð ekki náttúrufræðibrautum eða félagsfræðibrautum, eftir námsárið 2024 til 2025.
Þá brautskráðist um fimmtungur, eða 700 nemendur, af náttúrufræðibrautum og 522 nemendur af félagsfræðibrautum. Þá útskrifuðust 288 nemendur með stúdentspróf af viðskipta- og hagfræðibrautum, 230 af listabrautum, 86 af málabrautum og 80 af upplýsinga- og tæknibrautum. Eftirstandandi nemendur brautskráðust úr viðbótarnámi til stúdentsprófs, 457 nemendur, og alþjóðlegri braut eða International Baccalaureate, 30 nemendur.
Í frétt Hagstofunnar segir að nemendum sem brautskrást af öðrum brautum hafi farið mjög fjölgandi síðasta áratug, en 2016 brautskráðust aðeins 73 nemendur af slíkum námsbrautum.
Alls brautskráðust 3.332 nemendur með stúdentspróf skólaárið 2024 til 2025, þar af 1.887 konur og 1.445 karlar. Flestir brautskráðir stúdentar voru 19 ára við útskrift.
