Krem með kattarmintu hefur reynst álíka áhrifaríkt og DEET til að fæla í burtu moskítóflugur. Þetta sýna prófanir á kreminu í Úganda.
Kattarminta er algeng mintutegund. Nafnið er tilkomið vegna þess að jurtin gefur frá sér lykt sem kettir eru sólgnir í. Lyktin fælir auk þess burt moskítóflugur. Mintan hefur ekki verið markaðssett í þeim tilgangi áður.
DEET er aftur á móti algengt efni í flugnafælandi kremum eða úða. Það hefur til dæmis verið notað sem vopn í baráttu Íslendinga við lúsmýið. Aðeins er talið ráðlegt að nota efnið í litlu magni, þar sem það er talið geta haft neikvæð áhrif á heilsu manna og umhverfi í of stórum skömmtum.
Áhyggjur af aukn þoli flugnanna fyrir skordýraeitri
Í frétt á vef Guardian segir að nýjar lausnir þurfi í baráttunni gegn malaríu. Rúmlega 280 milljónir smitast af sjúkdómnum árlega en malaríusmit berast með biti moskítóflugna. Árið 2024 dró malaría 610 þúsund manns til dauða.
Áhyggjur hafa kviknað af auknu þoli flugnanna gegn skordýraeitri og -fælum og að virkni lyfja við malaríu fari dvínandi.
Á dögunum var rannsókn fræðimanna í Wales og Úganda á áhrifum kattarmintu kynnt í Flórens. Í ljós kom að kattarmintukremið reyndist frekar áhrifaríkt til að fæla burt flugurnar.
„Við komumst að því að krem sem innihélt 6% styrk kattarmintu var alveg jafn áhrifaríkt og DEET og krem með 2% kattarmintu var ívið minna áhrifaríkt,“ segir dr. Simon Scofield, dósent við háskólann í Cardiff.
Mikilvægt að finna ódýrari lausnir
Hann útskýrir að DEET sé of dýrt fyrir flesta bændur sem stunda sjálfsþurftarbúskap í Úganda. Þær fælur sem seldar eru í búðum standa þeim því hreinlega ekki til boða.
„Við vildum útbúa fælu sem er áhrifarík en líka þannig úr garði gerð að heimafólk getur tekið þátt í framleiðslunni svo að hún kosti þeim mun minna fé,“ segir Scofield.
Hann segir það ekki hafa verið kannað hvort kettir yrðu hændari að þeim sem bera á sig kremið.
„Í ljósi þess að virka efnið í kattarmintu er þekkt fyrir að laða að sér ketti þá geri ég ráð fyrir að þeim eigi eftir að líka kremið,“ sagði Scofield.
