Nýr konungur tók við í Noregi í morgun þegar Haraldur féll frá. Hákon varð konungur um leið og faðir hans andaðist. Hann er fjórði konungur landsins frá því það öðlaðist sjálfstæði 1905.
Hákon og Mette-Marit eru hin nýju konungshjón Noregs, þau fyrstu frá því Haraldur varð konungur 1991 og Sonja, eiginkona hans, drottning.
Vefur norsku hirðarinnar tók snöggum breytingum í morgun þegar Haraldur konungur féll frá. Búið er að fjarlægja tímabundið allt efni meðan vefurinn er uppfærður til að taka mið af því að nýr konungur er tekinn við í Noregi, Hákon.
Á vefnum blasir við mynd af Haraldi heitnum konungi í einkennisbúningi með heiðursmerki sín. Þar er því lýst með djúpri sorg að hann sé látinn.
Jonas Gahr Støre, forsætisráðherra Noregs, og Masud Gharahkhani, forseti norska stórþingsins, hafa lýst yfir sorg við fráfall Haraldar konungs.
„Það er með djúpri sorg í hjarta sem ég hef fengið skilaboðin um að hans hátign, Haraldur V, er látinn,“ sagði Støre. Hann átti að fara í opinbera ferð til Þýskalands en aflýsti henni þegar heilsu Haraldar hrakaði.
Masud Gharahkhani, forseti stórþingsins, var á Íslandi en flýtti heimför sinni til Noregs og kom þangað í gær.
„Við höfum misst ástkæran konung og þjóðin öll sameinast í sorg,“ sagði Gharahkhani og vísaði til einkunnarorða Haraldar „Allt fyrir Noreg“. Hann sagði að framganga Haraldar hefði einkennst af nálægð við þjóðina. Gharahkhani lýsti djúpri virðingu og þakklæti í garð konungs sem hefði sameinað Norðmenn í embættisstörfum sínum.
Norska hirðin greindi frá andláti Haraldar konungs á sjöunda tímanum í morgun, tveimur klukkustundum eftir að hann lést. Hann var konungur í rúm 35 ár og þótti framsækinn, mildur og alþýðlegur.
Haraldur var fyrsti ríkisarfinn sem fæddist í Noregi í um það bil 600 ár, á Skaugum í Asker. Markús Þórhallsson fréttamaður fór yfir ævi og störf Haraldar í frétt um andlát hans.
Haraldur, konungur Noregs, lést á Ríkissjúkrahúsinu í Ósló, klukkan 6:35 í morgun, 4:35 að íslenskum tíma. Haraldur var konungur Noregs í 35 ár, frá 17. janúar 1991.
Hákon krónprins varð konungur Noregs um leið og faðir hans andaðist. Hann er fjórði konungur Noregs frá því Noregur varð sjálfstætt ríki 1905. Hákon VII, sem fæddist í Danmörku, var fyrsti konungur hins sjálfstæða ríkis. Ólafur sonur hans tók við krúnunni 1957 og bar hana til dánardags 1991 þegar Haraldur tók við.
Við hefjum þessa fréttavakt þar sem við flytjum fréttir og viðbrögð við andláti Haraldar Noregskonungs. Ég heiti Brynjólfur Þór Guðmundsson og fylgi ykkur inn í daginn.
