Anthony Fauci, fyrrverandi sóttvarnalæknir Bandaríkjanna, neitaði að svara spurningum á fundi öldungadeildar Bandaríkjaþings í dag um uppruna covid. Hann sakaði þingmenn Repúblikana um að reyna að leggja fyrir sig gildru.
Tilgangur fundarins var meðal annars að kanna hvort Fauci hefði áður gefið þinginu rangar upplýsingar um heimsfaraldurinn. Fauci var einn helsti talsmaður bandarískra stjórnvalda meðan á heimsfaraldrinum stóð. Hann deildi reglulega opinberlega við Donald Trump Bandaríkjaforseta um viðbrögð stjórnvalda við veirunni.
Bar fyrir sig fimmta viðauka bandarískrar stjórnarskrár
Fauci neitaði að svara spurningum fulltrúa Repúblikanaflokksins á fundinum. Hann sagðist óttast að þingmenn flokksins reyndu að fá hann til að segja eitthvað sem stangaðist á við fyrri framburð hans.
Í því skyni vísaði hann til fimmta viðauka bandarísku stjórnarskrárinnar, sem heimilar fólki að neita að svara spurningum ef svörin gætu verið notuð gegn því í sakamáli.
Alþjóðaheilbrigðisstofnunin WHO sagði árið 2025 að sú kenning að veiran hefði borist frá dýrum til manna nyti mests stuðnings af þeim gögnum sem lægju fyrir. Stofnunin sagði þó ekki hægt að komast að endanlegri niðurstöðu án frekari upplýsinga.
Harðar deilur um uppruna veirunnar
Rand Paul, öldungadeildarþingmaður Repúblikanaflokksins, segir dagbókarfærslur Faucis benda til þess að hann hafi tekið til greina þann möguleika að veiran hafi orðið til á rannsóknarstofu, jafnvel þótt hann hafi opinberlega gert lítið úr því. Hann virðist þó síðar hafa sannfærst enn frekar um að um að veiran ætti sér náttúrulegan uppruna.
„Þótt tveir möguleikar séu fyrir hendi þýðir það ekki að þeir séu jafn líklegir,“ skrifaði Fauci í dagbókina.
Fauci sagði Paul staðráðinn í að koma sér í fangelsi og að í yfirheyrslunni ætlað að leggja fyrir sig gildru. Paul lét vísa lögmanni Faucis úr fundarsal þegar hann neitaði að svara spurningu hans í dag og Repúblikanar sökuðu lækninn um að bera ekki virðingu fyrir þinginu. Demókratar sögðu yfirheyrsluna vera tilraun Repúblikana til að koma sök á Fauci.
Fauci lét af störfum árið 2022. Hann fékk líflátshótanir vegna afstöðu sinnar til viðbragða við covid og sætti harðri gagnrýni Repúblikana vegna grímuskyldu og annarra sóttvarnaraðgerða.
