Paul De Courtois er framkvæmdastjóri fyrir 45 ólík markaðssvæði hjá þýska bílaframleiðandanum BMW, sem spanna Afríku til Austur-Evrópu og fleiri lönd, þar á meðal Ísland.
Hann bindur miklar vonir við að nýi alrafmagnaði miðstærðarjepplingurinn, sem ber heitið iX3, muni seljast vel hér á landi. Bifreiðin var kynnt með viðhöfn og að viðstöddu fjölmenni í tónlistar- og ráðstefnuhúsinu Hörpu á dögunum.
„Þó að bíllinn hafi ekki verið sýndur á Íslandi fyrr en núna, og enginn fengið að reynsluaka honum, hafa pantanir farið fram úr væntingum og lofa mjög góðu. Við vonumst til að áhuginn aukist enn frekar nú þegar iX3 hefur verið frumsýndur,“ segir Courtois í samtali við Morgunblaðið.
Tryggir vörumerkinu
Spurður að því hvort að BMW-eigendur séu tryggir vörumerkinu kveðst framkvæmdastjórinn telja að svo sé. „Við erum sjálfir trúir okkar umboðsaðilum og höfum verið að vinna með bílaumboðinu BL í meira en þrjátíu ár,“ segir Courtois sem tók við núverandi stöðu innan þýska bílarisans fyrir um tveimur árum. Hann hefur starfað hjá fyrirtækinu í meira en þrjátíu ár. „Við viljum halda áfram að sjá núverandi BMW-eigendur en einnig laða að nýja viðskiptavini.“
iX3 er fyrsti bíllinn af nýrri kynslóð bíla frá BMW sem gengur undir nafninu Neue Klasse, eins og Courtois útskýrir. Hann segir að BMW líti á Ísland sem mikilvægt rafbílaland. Því séu Íslendingar einir þeir fyrstu í heiminum til að fá bílinn, sem hann telur að henti þörfum landans vel.
Til útskýringar þá er Neue Klasse vísun í sígilda BMW „Neue Klasse“-bíla frá sjöunda áratugnum. BMW notar því nafnið til að undirstrika að nýtt tímabil sé að hefjast hjá fyrirtækinu.
Ný verksmiðja
Spurður að því hve mörg eintök af bílnum verði framleidd á ári kveðst framkvæmdastjórinn ekki mega gefa það upp. „En ég get sagt þér að við erum nýbúin að taka í notkun nýja verksmiðju í Debrecen í Ungverjalandi sem er í fremstu röð hvað sjálfbærni og nýsköpun varðar.“
Courtois segir að nýi bíllinn verði ekki kynntur til sögunnar á sama tíma alls staðar. „Við gerum það í tveimur bylgjum í Evrópu og svo annars staðar í heiminum og í Bandaríkjunum, sem tengist líka afköstum verksmiðjunnar.“
BMW hefur lengi verið þekkt sem gæðamerki bæði hér á Íslandi og erlendis. „Við seljum bíla í meira en 150 löndum í heiminum.“
Courtois segir að BMW hafi sterka stöðu í Evrópu. „Heimahöfnin er München í Bæjaralandi í Þýskalandi. Þar seljum við mikið af bílum. En heilt yfir um allan heim byggjum við á vönduðum ferlum og langri sögu. Vörumerkin okkar eru þrjú; BMW, Rolls Royce og Mini, auk mótorhjóla.“
Hörð samkeppni
Á síðustu árum hefur samkeppnin, einkum á rafbílamarkaði, harðnað mjög, m.a. með tilkomu bandaríska framleiðandans Tesla og fjölda vörumerkja frá Kína.
Spurður hvernig gangi í þessu nýja landslagi segir Courtois að þegar litið sé á tölurnar sjáist glöggt að vel gangi. „Það eru margir nýir aðilar á markaðinum en það ógnar ekki okkar stöðu. Við skilgreinum okkur í flokki úrvalsbíla [e. Premium]. Þar erum við víða söluhæst.“
Hann segir að árið 2025 hafi verið besta ár frá upphafi á því markaðssvæði sem hann ber ábyrgð á. „Í þessum 45 löndum sem ég held utan um vorum við í topp tíu í sölu í úrvalsflokknum.“
iX3 er að sögn Courtois sjötta kynslóð rafbíla frá BMW. „Við byrjuðum að gera rafbíla á áttunda áratug síðustu aldar en það var ekki fyrr en fyrir um tólf árum sem við fórum markvisst að fjöldaframleiða slík ökutæki. Við höfum lært mikið, meðal annars hvað varðar þróun rafhlöðunnar.“
805 km drægni
Uppgefin drægni bílsins við kjöraðstæður er eftirtektarverð eða 805 kílómetrar, sem þýddi að hægt væri að aka frá Reykjavík til Egilsstaða á einni hleðslu. „Við erum einnig mjög stolt af hleðsluhraðanum. Þú getur hlaðið bílinn frá 5% til 80% á sautján mínútum.“
Hann segir að þrátt fyrir áskoranir á mörkuðum sé stærð bílamarkaðarins í heiminum ekki að dragast saman.
„Þrátt fyrir meiri samkeppni og meiri kröfur og reglugerðir, einkum í Evrópu, þá höldum við áfram að bjóða upp á valmöguleika. Hér á Íslandi, þar sem 80% seldra bíla eru rafbílar, komum við nú með iX3 á markaðinn, sem verður frábær kostur fyrir Íslendinga. En svo höldum við áfram um allan heim að bjóða líka skilvirkar og sparneytnar bensín-, dísil- og tengiltvinnútgáfur.“
