Vændisstarfsemi viðgengst ekki á venjulegum hótelum sem bregðast við þegar eitthvað grunsamlegt er í gangi, segir Kristófer Oliversson, formaður Félags fyrirtækja í hótelrekstri. Samkvæmt almennum hegningarlögum er refsivert að hagnast á vændisstarfsemi, meðal annars með útleigu húsnæðis.
„Það er hægt að hagnast mikið á því að hagnýta fólk annað hvort í vinnu eða vændi. Þess vegna er það þannig að ef að það er einhver smuga, ef að það er hægt og látið óáreitt þá virðist alltaf vera til fólk sem er tilbúið að gera það í hagnaðarvon.“
„Þannig að okkar verkefni er þá að gera umgjörðina þannig að þetta fái ekki að vera óáreitt,“ segir Saga Kjartansdóttir, vinnumarkaðssérfræðingur hjá ASÍ.
Nauðsynlegt sé að tryggja örugga útgönguleið fyrir þolendur ásamt metnaðarfullri aðgerðaráætlun í mansalsmálum.
Hún telur að dæmi séu um að fólk sem leitað hafi til ASÍ vegna misneytingar í vinnu sé einnig þolendur vændismansals.
„Það hefur komið upp sterkur grunur hjá okkur að fólk sem leitar til okkar vegna einhverrar misneytingar, að það sé hugsanlega líka verið að hagnýta það í vændi,“ segir hún.
Einnig að sami aðili hagnýti ákveðna einstaklinga í vinnumansal og aðra í vændi.
Vændisstarfsemi viðgangist ekki á venjulegum hótelum
Eins og fram kom í Kveik í gær er vændi mikið til stundað í hótelíbúðum og Airbnb-íbúðum.
„Þetta var náttúrulega mjög átakanlegt að sjá þetta. Á hótelum er gestamóttaka, það er fólk í móttökunni og það eru öryggisvélar og þú gengur ekki fram og til baka eins og maður sá á þessum þætti á venjulegum hótelum,“ segir Kristófer.
Kristófer telur aukningu í vændisstarfsemi haldast fyrst og fremst í hendur við mikla fjölgun Airbnb-íbúða. En á mörgum gististöðum er ekki fólk í móttöku heldur sjálfsafgreiðsla þegar fólk mætir á staðinn.
Ekki náðist í eiganda Stay apartments í dag
Vændisstarfsemi grasserar til dæmis á hóteli Stay apartments í Einholti eins og sást í Kveik, og hefur gert lengi. Einnig á öðru hóteli úr sömu hótelkeðju. Fréttastofa hefur reynt að ná tali af eiganda hótelsins, án árangurs.
Í 206. grein almennra hegningarlaga segir að: Hver sem stuðlar að því með ginningum, hvatningum eða milligöngu að aðrir hafi samræði eða önnur kynferðismök gegn greiðslu eða hefur tekjur af vændi annarra, svo sem með útleigu húsnæðis eða öðru, skal sæta fangelsi allt að 4 árum en sektum eða fangelsi allt að 1 ári ef málsbætur eru.
Á hótelum sé brugðist við grunsamlegri umferð og hegðun
Heldur þú að eigendur séu í einhverjum tilfellum meðvitaðir eða hagnast að einhverju leyti á starfseminni?
„Það get ég ekki fullyrt. Á hótelum, ef þú sérð að það er einhver traffík á einhverju herbergi, þú sérð það strax - þá er strax brugðist við því hvort sem þar eru fíkniefni eða eitthvað annað,“ segir Kristófer.
„Það er mjög auðvelt að fylgjast með þessu á hótelum en það er erfiðara þar sem húseigendur eru hvergi nærri, sko,“ segir hann.
Geta eigendur raunverulega firrt sig ábyrgð á svona starfsemi þegar hún hefur fengið að viðgangast árum saman?
„Mér finnst það ekki en ég er ekki löggjafinn,“ segir Kristófer.
