Svava Sigbertsdóttir einkaþjálfari er nú flutt heim eftir 22 ár í London en hún hefur verið að gera góða hluti með æfingaprógrami sínu The Viking Method. Í gegnum tíðina hefur hún þjálfað stórstjörnur á borð við Nicole Scherzinger, Amanda Holden og fyrirsætuna Suki Waterhouse. Árið 2019 gaf hún út bókina The Viking Method sem hefur heldur betur slegið í gegn. Nú er hún að fara af stað með nýtt prógramm sem lofar mjög góðu.

Svava er alin upp í Árbænum og segist alltaf hafa verið mjög mikið í íþróttum og tómstundum og þá helst í fótbolta, handbolta, dansi og kickboxi. Hún elskar að læra nýja hluti og stunda nýja hreyfingu. „Þegar ég var 24 ára fór ég í söngleikjanám til London í þrjú ár. Ég heillaðist svo af London að eftir það ákvað ég að flytja alfarið út með dóttur mína sem ég eignaðist þegar ég var 18 ára. Ég fann það svo að námi loknu að mig langaði svo miklu meira að vinna við hreyfingu og að hjálpa fólki að líða vel í sínum eigin líkama og huga.“

Fyrstu árin var hún í námi með vinnu og tók einkaþjálfarann, næringarfræði og jógakennarann. „Ég byrjaði að vinna sem þjálfari og sá fljótlega að það er alið upp í konum að útlit samsvari virði þeirra. Og ekki bara útlit, heldur mjög ákveðið útlit, útlit sem samfélagið segir að sé aðlaðandi. Og ef þú ert ekki akkúrat með það, ertu minna virði. Þetta getur svo stjórnað því hvernig við lítum á okkur sjálfar og metum okkar eigin líkama.“

Í kjölfar þess langaði Svövu að athuga hvort hún gæti hannað heilsumeðferð sem snerist á engan veg um ytra samþykki, heldur einungis um innri vellíðan. „Ég vann á daginn og þegar dóttir mín var sofnuð vann ég í að búa til þá aðferð sem heillaði mig og úr varð The Viking Method. Ég átti ekkert á þessum tíma, við vorum bara tvær, ég og dóttir mín, í landi þar sem ég hafði enga fjölskyldu, þekkti engan og hafði engin sambönd né tengslanet.“.

Ég fékk fullt af nei-um

Það sem Svava bjó að var trúin á eigin getu og svo átti hún lausan tíma á kvöldin sem hún gat nýtt í þessa hugmyndavinnu. „Og það er nóg í byrjun. Það er ekki hægt að bíða þar til maður hefur meira eða bíða eftir hinum fullkomna tíma. Maður byrjar þar sem maður er með það sem maður hefur. Og restina lærir maður á leiðinni.“

Eftir að hún setti upp The Viking Method var mesta vinnan í rauninni eftir, það var að koma þessu áfram og kynna meðferðina. „Þú getur verið með frábæra vöru, en ef enginn veit af henni þá er eins og hún sé ekki til. Þannig eyddi ég mörgum mánuðum í að tala við líkamsræktarfrömuði, senda tölvupósta á fjölmiðlafólk til að fá umfjöllun og hafa samband við þekkt fólk til að fá að þjálfa það. Ég fékk fullt af nei-um, sem ég var alveg ókei með, af því að það versta sem þú færð er nei. Það er alltaf þess virði að spyrja og halda áfram að spyrja þar til þú færð já, sem ég svo byrjaði að fá frá öllum: ræktinni, fréttafólki og frægu fólki.“

Fylla þig af sjálfri þér

Eftir mikla markaðsvinnu byrjaði Svava að þjálfa stjörnur á borð við Nicole Scherzinger, Suki Waterhouse og Amöndu Holden. „Ég var að þjálfa fólk í The Viking Method einkaþjálfun og bjó til online prógröm. Eftirspurnin jókst smátt og smátt á þessum tíma og með aukinni þátttöku fór orðið að berast á milli manna um ágæti þessarar meðferðar á líkama og sál. Fjölmiðlafólk kom á æfingar til mín og þjálfaði með mér ókeypis í marga mánuði og gerði svo grein fyrir því hverju aðferðin væri að skila sér. Ég gerði lítið annað á þessum árum en að vinna og vera með dóttur minni og hef reyndar alltaf elskað það; að sjá hve vel fólki líður eftir æfingarnar.

Í dag þjálfar Svava fólk út um allan heim. „Ég hef ferðast á heilsuhátíðir, ég fór til Tyrklands og vann þar með Hummel í heilsuauglýsingaherferð. Ég hef unnið með the North face, MTV, Victoria´s Secret, Lulu Lemon og fleirum. Fyrir nokkrum árum gaf bókaútgáfan Penguin The Viking Method bókina út á heimsvísu. The Viking Method snýst ekki um að líta út á einhvern ákveðinn hátt. Hún snýst meira um að líða á ákveðinn hátt og um að bæta stanslaust við sig góðum hlutum. Og að FYLLA ÞIG AF SJÁLFRI ÞÉR. Við erum yfirfull af neikvæðum sjálfs- og líkamsskoðunum, álitum annarra, lágu sjálfmati og fullkomnunaráráttu sem kemur ekki frá okkur. Við bjuggum þetta ekki til, heldur hefur þessum neikvæðu sjálfsviðhorfum verið plantað í okkur frá því við fæðumst. Þannig að með þessari aðferð erum við að taka stjórnina til baka. Henda út því sem er ekki að gera neitt fyrir okkur og ákveða sjálf hvað við viljum fylla okkur með. Það sem við trúum um sjálf okkur ræður hegðun okkar. Við erum að taka lygarnar út sem við fengum að utan.“

Svava vill að við hugsum um okkur eins og við værum Víkingar. „Ég flutti nýlega aftur heim eftir 22 ár í London vegna þess að dóttir mín flutti heim fyrir þremur árum út af vinnu sem hún fékk á Íslandi eftir að hún kláraði háskólanámið sitt í London, er að eignast dóttur. Og það er engin staður sem ég myndi frekar vilja vera á en með þeim.“

Algjört bull

Síðustu misseri hefur Svava verið að vinna að nýju prógrammi. „Ég er búin að vera með konur í þjálfun hjá mér í nýja prógramminu og ætla mér að halda áfram með það með konum hér á Íslandi; sem ég er svo spennt fyrir. Og öll hugmyndafræði The Viking Method er í því. Þetta prógramm kallast Persónulega prógrammið. Það er algjörlega einstaklingsbundið og mjög persónulegt sem byggist þannig á að þú átt að geta vel ráðið við það.

Aðalástæðan fyrir því að konur gefast upp er ekki af því að þær eru ekki með nógu mikinn aga. Það er heldur ekki út af því að þær séu „of góðar við sig“ eða veikeðja, eða að ástæðan sé einhver aumingjaskapur. Það er ekkert rangt við einn eða neinn. Út af þessum stanslausa hávaða frá umheiminum um að konur eigi, verði, að líta út á einhvern ákveðinn hátt eru konur oft að setja sér röng markmið. Ég hef svo oft verið spurð út í þetta í viðtölum, hvað konur eigi að gera til að fá líkama eins og Nicole Scherzinger, og ég HATA þessa spurningu. Þessi stanslausi samanburður sem verið er að setja á okkur er svo óhollur að segja að líkami hennar eigi að vera eitthvað markmið fyrir okkar líkama. Það er algjört bull. Við erum allar með mismunandi líkama. Engir tveir líkamar eru eins. Þú gætir búið með Nicole, gert nákvæmlega allt það sama og hún gerir, og þú myndir ekki fá eins líkama og Nicole. Af því að engin getur verið með líkama eins og Nicole nema Nicole. Af því að það er hennar líkami. Alveg eins og það getur engin verið með líkamann þinn nema þú.“

Rangt markmið

Svava vill endurforrita það hvernig við setjum okkur markmið. „Röngu markmiðin eru að líkaminn þinn verði að líta út á mjög ákveðinn hátt til að þú getir verið sátt við þinn líkama, og/eða þú þarft að sjá ákveðna tölu á vigtinni til að þú getir verið sátt við þinn líkama. Og þegar þú ert með þessi markmið, þá ertu að koma frá stað sem segir að þinn líkami sé „rangur“, að þú þurfir að taka eitthvað af þér eða frá þér. Þegar þú kemur frá þeim stað sérðu ekkert af því góða sem þú ert að fá með því að æfa, sérð ekkert af því jákvæða, aðeins að þú ert ekki enn með líkamann sem þú þarft að hafa og ert ekki í þyngdinni sem þú vildir vera í. Að æfa verður að refsingu fyrir það; þú ert ekki nógu góð eins og þú ert og þú þarft að æfa til að breyta því. Leiðin er allt eða ekkert. Það er ekkert hægt að setja þak á „allt.“. Þú ert aldrei að gera nóg og gætir alltaf gert meira. Engin getur haldið þessu áfram til frambúðar. Þarna gefast konur upp, auðvitað, og kenna sér svo um. Ástæðan er ekki, sem það er, að markmiðið og planið voru röng, heldur er ástæðan að þær eru ekki nógu agaðar, nógu öflugar, nógu góðar. Þessi ferill er svo endurtekinn aftur og aftur. Af því að ranga markmiðið og ranga planið eru alltaf endurtekin. Í Persónulega prógramminu hjá mér hendum við þessu í ruslið. Við erum að koma frá allt öðrum stað, með markmið og plan sem er rétt. Það er ekkert að þér og þínum líkama. Það eina sem við erum að gera er að bæta við þig. Það er EINA markmiðið. Bæta við þig styrk, bæta við þig krafti, snerpu, jafnvægi, liðleika og samhæfingu, og þegar þú kemur frá þeim stað sérðu allt í jákvæðara ljósi. Alla öflugu viðbætinguna í hvert einasta skipti sem þú æfir og það er svo geggjað að upplifa það.

Það fyrsta sem ætlast er til í nýju aðferðinni er að hittast. „Eftir að kona skráir sig í prógrammið, það fyrsta sem við gerum er að við hittumst. Við ræðum um allt sem viðkemur henni. Hennar samband við sjálfa sig, sinn líkama, hennar líf, hennar sjálfsálit og skoðanir, hvaðan þær koma og hvaða áhrif þær hafa haft, á ALLT. Við förum saman yfir hennar vikulegu lífsrútínu, því að allir hafa mismunandi tíma. Þú gætir haft 30 mín á mánudegi, 20 mín á fimmtudegi og 60 mín á laugardegi til að æfa. Allir eru mismunandi. Sérstaklega þegar þú ert að byrja á einhverju nýju, verður það að vera auðvelt að gera. Ég hanna sérhæft plan með allt þetta í huga. Það sem ég set upp er það eina sem hún á að gera. Ekkert meir. „Allt“ er með þaki. Prógrammið kemur svo bæði með hennar persónulega líkamlega æfingarprógrammi og einnig, sem er það mikilvægasta, af því það stjórnar svo hvað við gerum, með myndböndum sem eru fyrir hana persónulega til að bæta sambandið við sjálfa sig, bæta sjálfstraustið, sjálfsvirðinguna, innri styrk, kraft og vingjarnleika. Við erum að FYLLA OKKUR AF OKKUR SJÁLFUM. Þetta er þitt líf. Tími til kominn að taka risa pláss í því. Þú finnur Persónulega Prógrammið inni á vefsíðunni www.thevikingmethod.co.uk