Stefanía Karlsdóttir, landeigandi vestan við Stuðlagil, segir margt hafa verið gert til að stuðla að bættu öryggi síðastliðin ár. Ferðamaður féll í Jöklu austan megin í Stuðlagili á mánudag og er það annað banaslysið þar á tveimur árum.
Auðdís Tinna Hallgrímsdóttir leiðsögumaður varð vitni að slysinu og segir öryggi við gilið verulega ábótavant. Hún gagnrýndi að banaslys þyrfti til að eitthvað væri gert til að bæta öryggi.
„Það er bara ekki rétt. Ferðamálastofa og Framkvæmdasjóður ferðamannastaða hafa staðið alfarið á bak við landeigendur beggja vegna ár í að bæta öryggisinnviði,“ segir Stefanía Karlsdóttir. „Það er búið að byggja upp verulega mikla innviði nú þegar.“
Síðastliðin átta ár hafa verið byggðir innviðir, svo sem göngustígar og pallar vestan megin við Stuðlagil. Uppbyggingin hefur verið aðeins hægari fyrir austan en til stendur að byggja þar meira.
„Ég verð að segja það að menn verða að anda ofan í kviðinn og ekki endilega fara að kasta því á einhvern annan að þetta mál hafi ekki verið í betra horfi. Það gera allir sitt besta í þessum málum.“
Framkvæmdasjóður ferðamannastaða hefur samtals úthlutað um 550 milljónum til uppbyggingar við gilið.
Í vor hlaut landeigandinn austan megin 70 milljón króna styrk.
Öryggisuppbygging í farvatninu
Marteinn Óli Aðalsteinsson, landeigandi austan við Stuðlagil, segir við fréttastofu að nú þegar hafi verið ráðist í mikla stígagerð meðfram og að gilinu. Þá hafi verið komið fyrir merkingum sem vara við fallhættu.
Í haust og vetur stendur svo til að smíða stíga niður í gilið og koma fyrir lokunarpósti þegar ekki er öruggt að fara þangað niður.
Marteinn bendir á að það sé vandmeðfarið að hvaða marki skuli girða af villta náttúru. Hann reyni þó að stuðla að öryggi eftir fremsta megni svo ekki þurfi að loka alfarið fyrir aðgengi fólks að ferðamannastaðnum.
„Við erum að reyna að gera þetta eins öruggt og hægt er,“ segir hann.
