Við ljúkum þessari fréttavakt með viðtalinu við Valla sport, sem ykkur var lofað áðan.
„Það er rosalegur dofi í fólki og fólk er svona í biðstöðu. Það veit ekki hvernig því á að líða – það sækist eftir samveru með fjölskyldu. Þetta er svolítið sérkennilegt fyrir Íslending að skilja, hvernig þessar tilfinningar eru, vegna þess að við höfum enga manneskju sem við tengjumst við á þennan hátt,“ segir hann meðal annars.
Ástand Haraldar Noregskonungs er enn alvarlegt, síðasta tilkynning frá norsku hirðinni barst um þrjú leytið og þar kom fram að líðan konungs væri óbreytt.
Haraldur var lagður inn á spítala í Ósló 17. ágúst vegna blóðsýkingar og hefur dvalið þar síðan. Blómvöndum hefur verið staflað upp við konungshöllina í Osló. Fjöldi fólks hefur gert sér ferð þangað með blóm, kerti og kort fyrir konunginn.
Ólöf Ragnarsdóttir þakkar ykkur samfylgdina í dag.
Jonas Gahr Støre, forsætisráðherra Noregs, var í viðtali hjá TV 2 í Noregi. Hann segir að heil þjóð vaki nú yfir konungi sínum.
„Alvarlegt heilsufarsástand konungsins hefur mikil áhrif á mig. Fjölskylda hans er hjá honum. Ég held það sé óhætt að segja að í dag hafi heil þjóð staðið við hlið hans og vakið yfir honum,“ segir Støre.
Hann segir fullkomlega eðlilegt að ráðamenn hafi hætt við fyrirhugaða fundi og aðrar skyldur. Støre segir viðbrögð Norðmanna hafa hreyft við sér.
„Og ég held að þetta sé einfaldlega enn ein staðfesting á þeirri sterku stöðu sem Haraldur konungur hefur hjá norsku þjóðinni.“
Viðtalið í heild má sjá í myndskeiðinu hér að ofan, fyrir þau sem skilja norsku að njóta.
Nú er Sonja drottning, eiginkona Haraldar, farin frá spítalanum. Hún hefur verið þar í allan dag.
Hákon krónprins og Mette-Marit krónprinsessa eru farin aftur að heiman. Þau fóru heim frá spítalanum fyrr í dag að heimili sínu í Skaugum.
NRK greinir frá þessu.
Haraldur konungur vakti heimsathygli með ræðu sem hann hélt fyrir tíu árum þar sem hann talaði hástöfum meðal annars fyrir réttindum hinsegin fólks og innflytjenda.
Tilvitnun úr þeirru ræðu hefur verið rifjuð upp víða og greinilega búið að gera plaggat út frá henni.
„Nordmenn er jenter som er glad i jenter, gutter som er glad i gutter, og jenter og gutter som er glad i hverandre,“ stendur á plaggatinu.
Þetta mætti þýða sem: „Norðmenn eru stelpur sem elska stelpur, strákar sem elska stráka og stelpur og strákar sem elska hvort annað.“
Valgeir Magnússon, auglýsingamaður og stjórnarformaður Pipar\TBWA, starfar í Osló. Hann er líklega betur þekktur sem Valli sport og er með skrifstofu nærri norsku konungshöllinni.
„Það eru ótrúlega miklar tilfinningar sem að Norðmenn bera til kóngsins og það er búið að vera stöðugur straumur að höllinni, fólk með blóm. Og blóm eru að verða uppseld og held ég að séu orðin uppseld í öllum blómabúðum í Ósló þannig að fólk er að útvega sér blóm með að klippa blóm úr garðinum sínum.“
Guðmundur Atli Hlynsson fréttamaður ræddi við Valgeir og við birtum viðtalið á ruv.is von bráðar.
Hér er nýtt myndskeið frá konungshöllinni í Osló. Blómvöndum er staflað upp og inn á milli leynast einnig kort til konungsins og kerti.
Ungar konur röðuðu kertum þannig að þau mynda hjarta.
Norska ríkisútvarpið hefur ákveðið að fella niður umræðuþáttinn Debatten. Hann er á dagskrá vikulega.
Í staðinn verður áfram útsending um líðan Haraldar konungs.
Norska hirðin hefur gefið út nýja tilkynningu. Í henni segir að líðan Haraldar konungs sé óbreytt.
Í morgun var tilkynnt að heilsu hans hafi hrakað og að ástand hans sé mjög alvarlegt. Konungurinn hefur verið á Ríkissjúkrahúsinu í Ósló undanfarna tíu daga vegna blóðsýkingar.
Glöggir lesendur sjá kannski að það er komið streymi hér að ofan. Þetta er beint streymi frá konungshöllinni í Osló þar sem fólk hefur safnast saman og mörg lagt niður blómvendi.
Það virðist stöðugt streymi þangað af fólki.
Norska ríkisútvarpið NRK er með útsendingu á NRK1 og á vefnum, þar er ekki fjallað um neitt annað en Harald konung.
Rætt er við fólk víða um land og mörg eru sammála um að hann sé bæði traustur og alþýðlegur.
Hákon krónprins og Mette-Marit krónprinsessa eru farin heim af spítalanum. Börn þeirra Ingiríður Alexandra og Sverrir Magnús einnig.
NRK greinir frá þessu en vitnar í Verdens Gang.
Masud Gharahkhani, forseti Stórþingsins, er lentur í Noregi. Hann var í heimsókn hér á Íslandi en fór fyrr heim. Marius Høiby, stjúpsonur Hákons krónprins, er farinn af spítalanum, líklega heim til sín því þar á hann að vera með ökklaband.
Høiby var í sumar dæmdur til fjögurra ára fangelsisvistar fyrir tvær nauðganir, ofbeldi í nánu sambandi, líkamsárás og fjölmörg brot á nálgunarbanni auk annarra brota.
Ástríður prinsessa og eldri systir konungs er ekki lengur á sjúkrahúsinu. Hún fór þaðan um 12:30 að íslenskum tíma. NRK greinir frá þessu.
Fólk streymir enn að konungshöllinni í Osló og sífellt bætist í blómahafið þar. Hér er myndskeið frá höllinni.
- Haraldur konungur er þungt haldinn og norska hirðin segir stöðuna alvarlega.
- Norska hirðin notar alla jafna yfirvegað orðfæri í tilkynningum en svo er ekki nú.
- Konungsfjölskyldan hefur safnast saman á Ríkissjúkrahúsinu í Ósló.
- „Við verðum að búa okkur undir það versta,“ segir Bjørn Tore Gjertsen sem er yfirlæknir blóðsjúkdómadeildar á öðrum spítala í Noregi.
- Jonas Gahr Støre, forsætisráðherra Noregs, hætti við fyrirhugaða heimsókn til Þýskalands.
- Fólk hefur safnast saman við konungshöllina í Osló og lagt þar blómvendi.
Fólk er tekið að safnast saman við konungshöllina og leggja þar blómvendi. Ein þeirra er Gørild Grande sem NRK ræddi við. Hún komst við þegar hún talaði um Harald konung.
„Mér datt í hug að ég gæti sýnt góðum konungi virðingu og kærleika,“ segir Grande.
Fréttamaður spyr hana hver Haraldur konungur sé fyrir henni. „Hann er maður sem sameinar landið, sameinar þjóðina. Hann tekur tillit til allra og sýnir öllum kærleika. Hvort sem þú ert strákur sem elskar strák eða stelpa sem elskar stelpu. Það segir mikið um þann mann sem hann hefur að geyma.“
Þess má geta að Haraldur konungur vakti heimsathygli með ræðu sem hann hélt fyrir tíu árum þar sem hann talaði hástöfum meðal annars fyrir réttindum hinsegin fólks og innflytjenda.
Hákon krónprins hefur ekki verið mikið í sviðsljósinu upp á síðkastið heldur frekar eiginkona hans Mette-Marit krónprinsessa og stjúpsonur Marius Borg Høiby.
Sjálfur er Hákon vinsæll í Noregi. Þótt vinsældir konungsfjölskyldunnar í heild sinni hafi farið dvínandi þá fær Hákon persónulega góða einkunn frá þjóðinni, yfirleitt um 9 af 10 mögulegum.
Hákon er fæddur 20. júlí 1973 og er sonur Haraldar konungs og Sonju drottningar. Hann er tveimur árum yngri en Marta Lovísa prinsessa en hann er ríkisarfinn vegna þess að lögum um ríkiserfðir var ekki breytt fyrr en árið 1990. Aðeins eftir 1990 gátu konur erft krúnuna jafnt sem karlar. Hákon var fæddur krónprins og lögin ekki afturvirk.
Frá unga aldri hefur Hákon haft áhuga á vatnaíþróttum, útiveru og tónlist. Hann hefur reynt að samþætta útivist við störf sín og hann fór til að mynda í göngu að gosstöðvunum við Fagradalsfjall ásamt Guðna Th. Jóhannessyni forseta þegar hann kom til Íslands árið 2022.
Árið 2001 giftist hann Mette-Marit Tjessem Høiby sem þá varð krónprinsessa Noregs. Mette-Marit var einstæð móðir af alþýðuættum og ekki voru allir Norðmenn sáttir við ráðahaginn. Þau eiga tvö börn saman, Ingiríði Alexöndru prinsessu sem er fædd 2004 og Sverri Magnús prins sem er fæddur 2005.
Ákveðið ferli fer í gang þegar konungur deyr í Noregi, til dæmis er almenningi og fjölmiðlum ekki tilkynnt andlátið umsvifalaust.
Áður en það er gert skal öll nánasta fjölskylda látin vita. Forvígismenn ríkisstjórnar, forsætisráðherra og lykilstarfsmenn hirðarinnar eru upplýstir á undan almenningi og þá gildir einu á hvaða tíma sólarhrings konungur andast.
Formlega séð verður krónprinsinn konungur á sama augnabliki og konungur andast. Noregur má ekki verða án þjóðhöfðingja.
Hann tilkynnir ríkisstjórninni andlát föður síns formlega og konungsnafnið á ríkisráðsfundi sem halda þarf umsvifalaust.
Hefðbundin krýning var afnumin í Noregi snemma á 20. öld en nýr konungur og drottning verða blessuð í Niðarósdómkirkju í Þrándheimi nokkrum mánuðum eftir valdatökuna.
Norskir miðlar fylgjast grannt með öllu sem gerist. Hér er myndskeið af konungsfjölskyldunni mæta á spítalann í morgun.
Meira af Jonasi Gahr Støre forsætisráðherra Noregs. Hann hefur hætt við ferð til Þýskalands í dag. Þar átti hann að mæta á fundi og vinnukvöldverð með Friedrich Merz kanslara Þýskalands.
Þá ætlar Masud Gharahkhani, forseti norska þingsins, að fara fyrr heim frá Íslandi. Hann kom hingað í gær til þess að taka þátt í fundi forseta þjóðþinga Norðurlanda og Eystrasaltsríkja og átti að fara heim á morgun. Nú reynir hann að komast heim sem allra fyrst.
Ólöf Ragnarsdóttir er mætt á vaktina og segir ykkur helstu tíðindi frá Noregi fram eftir degi.
Jonas Gahr Støre, forsætisráðherra Noregs, sendi Haraldi konungi kveðju á sjúkrahúsið í dag.
Hann sagði það hafa djúp áhrif á sig að heilsu konungs hefði hrakað. Hann sagðist senda konungi og fjölskyldu hans hlýjar kveðjur fyrir sína hönd og þjóðarinnar. Støre sagðist jafnframt fullviss um að konungur nyti góðrar meðferðar og umhyggju á ríkisspítalanum.
Með þessum tíðindum kveður Brynjólfur Þór Guðmundsson og Ólöf Ragnarsdóttir tekur við stjórninni á þessari fréttavakt.
Marius Borg Høiby, sonur Mette-Marit krónprinsessu, er mættur á ríkissjúkrahúsið í Ósló þar sem Haraldur konungur liggur þungt haldinn. Vårt land greindi frá komu hans og birti mynd.
Høiby var í sumar dæmdur til fjögurra ára fangelsisvistar fyrir tvær nauðganir, ofbeldi í nánu sambandi, líkamsárás og fjölmörg brot á nálgunarbanni auk annarra brota.
Konungsfjölskyldan hefur safnast saman á Ríkissjúkrahúsinu í Ósló vegna versnandi heilsu Haraldar konungs.
Bjørn Tore Gjertsen er yfirlæknir blóðsjúkdómadeildar við Haukeland-háskólasjúkrahúsið. Norska ríkisútvarpið NRK fékk hann til að leggja mat á ástand Haraldar út frá þeim upplýsingum sem hafa verið gefnar út.
„Ef við lítum til aldurs hans og þess sem við vitum um veikindasögu hans þá held ég að við verðum að horfast í augu við að þetta er mjög alvarlegt og að við verðum að búa okkur undir það versta.“
Gjertsen segir að hár aldur konungs hjálpi ekki til því hann setji því hömlur hvað sé hægt að gera til að bæta heilsu hans. Yfirlæknirinn sagði þó að konungur væri á besta mögulega stað, ríkisspítalinn væri með mjög góða deild á heimsmælikvarða til að meðhöndla blóðsjúkdóma.
Haraldur konungur er fimmti norski konungurinn sem ber það nafn. Hann fæddist 21. febrúar 1937, sonur Ólafs krónprins og Mörthu krónprinsessu.
Haraldur fór í útlegð ásamt fjölskyldu sinni þegar Þjóðverjar hernumu Noreg 1940 og ólst upp hluta ævinnar í Svíþjóð og Bandaríkjunum.
Haraldur keppti í siglingum á þrennum Ólympíuleikum, frá 1964 til 1972.
Haraldur varð krónprins 1957 þegar Hákon afi hans lést og Ólafur faðir hans varð konungur. Haraldur varð konungur 17. janúar 1991, fyrir 35 árum. Haraldur varð fyrsti konungur Noregs frá 1380 sem fæddist sjálfur í Noregi.
Haraldur giftist Sonju Haraldsen 1968 og eiga þau tvö börn, Hákon krónprins og Mörthu Lovísu prinsessu. Ólafur konungur, faðir Haraldar, var í fyrstu tregur til að samþykkja hjónabandið því Sonja er ekki af konungsættum.
Norska ríkisútvarpið NRK leitaði til Ole-Jørgen Schulsrud-Hansen, sérfræðings í málefnum norsku konungsfjölskyldunnar, og fékk hann til að rýna í tilkynningu hirðarinnar um heilsu konungs.
Schulsrud-Hansen sagði að alla jafna notaðist hirðin við yfirvegað orðfæri í tilkynningum sínum. Nú vekti athygli að hún notaði afdráttarlaus og sterk orð í tilkynningu og segði ástand konungs mjög alvarlegt.
Hann segir að þetta valdi sér áhyggjum því fólk hafi vonast til að fyrri orð um að ástand konungs væri stöðugt væru enn í fullu gildi. Nú virðist það ekki lengur eiga við.
Haraldur konungur hefur lengi glímt við heilsubrest. Í febrúar var hann lagður inn á sjúkrahús meðan hann var í fríi á Tenerife og síðan fluttur heim til Noregs.
Haraldur var lagður inn á spítala í Ósló 17. ágúst vegna blóðsýkingar og hefur dvalið þar síðan.
Hákon krónprins, Mette-Marit krónprinsessa, Sonja drottning og Sverrir Magnús prins eru komin á sjúkrahúsin til að vera hjá konuningum.
Góðan dag og velkomin í fréttavakt um heilsufar Haraldar Noregskonungs.
Norska hirðin tilkynnti í morgun að heilsu konungs hefði hrakað enn og að ástand hans væri mjög alvarlegt. Krónprinsinn og drottningin hafa aflýst öllum þeim viðburðum sem þau áttu að taka þátt í.
Ég heiti Brynjólfur Þór Guðmundsson og fylgi ykkur inn í daginn.
