Páll Vilhjálmsson skrifar:
Blaðamannafélag Íslands samþykkti ályktun á aðalfundi í síðustu viku. Gagnrýni á blaðamenn jafngildir atlögu,,að fjölmiðlafrelsi og rétti almennings til upplýsinga" og skerðir getu blaðamanna að sinna ,,lykilhlutverki sínu í lýðræðinu."
Stóryrtri ályktun BÍ fylgja engin dæmi. Ekki eitt tilvik er nefnt. Þó er fullyrt að grafið sé
undan trúverðugleika blaðamanna með ómálefnalegum árásum, dylgjum og alvarlegum ásökunum vegna starfa þeirra
Hverjir skyldu standa að baki stórstríði gegn blaðamönnum? Þar sem engin dæmi eru nefnd verður snúið að átta sig á hverjir standa fyrir ,,síaukinni og harðnandi orðræðu í garð blaðamanna og fjölmiðla." Eina vísbendingu er að finna í ályktun fagfélags blaðamanna. Þar segir að gagnrýnin komi meðal annars frá
kjörnum fulltrúum og öðrum áhrifaaðilum í samfélaginu
Virkilega? Kjörnir fulltrúar á alþingi leggja nótt við nýtan dag að moka peningum í fjölmiðla. Jafnvel hallærislegar örútgáfur eins og Heimildin, mönnuð sakborningum í glæparannsókn, fær árlega um 70 milljónir króna gagnrýnislaust.
Nútíminn birti frétt um að Brynjar Níelsson varaþingmaður sé óvinur blaðamannastéttarinnar samkvæmt skilgreiningu BÍ. Brynjar skrifaði grein á Vísi og sýndi fram á hve fréttamenn RÚV eru tvöfaldir í roðinu er þeir fjalla um stjórnvöld. Vinstristjórn er tekin silkihönskum en hægristjórnir finna til tevatnsins. Aðfinnsla varaþingmannsins er ábending um alþekkta staðreynd fremur en gagnrýni.
Blaðamenn eru ekki gagnrýndir af kjörnum fulltrúum. Þá eru eftir ,,aðrir áhrifaaðilar i samfélaginu." Hverjir skyldu það vera? Kannski norðlenskur skipstjóri sem varð fyrir byrlun, þjófnaði og stórfelldri árás á einkalífið að undirlagi blaðamanna?
Skipstjórinn er fylginn sér og lætur ekki átölulaust að blaðamenn og RÚV stundi lögbrot og siðleysi. Er Páll skipstjóri Steingrímsson sá ,,áhrifaaðili í samfélaginu" sem er tilefni ályktunar Blaðamannafélags Íslands?
Ályktun BÍ birtist í sömu viku og tveir blaðamenn, Aðalsteinn Kjartansson á Heimildinni og stjórnarmaður BÍ og Helgi Seljan á RÚV, sögðu Emil félaga sínum á Berlingske að skipstjórinn héldi fyrir þeim vöku. Í Danmörku þótti það frétt að sjómaður haldi íslensku blaðamannastéttinni í heljargreipum.
Ríkisstyrktir blaðamenn hér á landi eru ekki ofsóttir. En þeir láta gott heita að fáeinir í stéttinni stunda lögbrot og fara fram af fullkomnu siðleysi í störfum sínum. Það er blaðamanna að uppræta illgresið í eigin garði.
