Það er ekkert leyndarmál að gagnaver losa mikið magn CO₂ út í andrúmsloftið. En niðurstöður nýrrar rannsóknar benda til að þau hafi einnig áhrif á jarðveginn, það er að segja hitastig hans.
The Independent segir að vísindamenn við Cambridge háskólann hafi rannsakað 6.000 gagnaver, fyrir gervigreind, og komist að því að jarðvegurinn nærri þeim var að meðaltali tveimur gráðum heitari en annars staðar og í öfgafyllstu tilfellunum var hann níu gráðum heitari.
The Independet segir að þetta fyrirbæri sé nefnd „heitar eyjur“ og sé að finna um allan heim.
Höfundar rannsóknarinnar segja að þessi aukni hiti í jarðveginum geri líf rúmlega 340 milljóna jarðarbúa hlýrra en ella.
Vísindamennirnir rannsökuðu gögn um hita síðustu tuttugu ár. Þess utan öfluðu þeir sé gagna frá fjarskynjurum og báru saman við staðsetningu risastórra gagnavera, sem hýsa mörg þúsund netþjóna og eru allt að 100.000 fermetrar.
Þeir beindu sjónum sínum að rúmlega 6.000 gagnaverum, sem eru ekki nærri þéttbýli, því yfirborðshitinn í kringum þau verður fyrir minni áhrifum af öðrum þáttum eins og iðnaði og húshitun. Vísindamennirnir tóku tillit til árstíðabundinna sveiflna, hnattrænnar hlýnunar og annarra þátta.
Rannsóknin hefur ekki verið ritrýnd að sögn CNN.
Dramatískar afleiðingar
Vísindamennirnir telja að niðurstöðurnar séu mikið áhyggjuefni að sögn CNN. Þeir sýndu meðal annars fram á að áhrifanna frá gagnaverunum gæti í allt að tíu kílómetra fjarlægð frá þeim.
Þar sem notkun gervigreindar fer vaxandi, og á bara eftir að aukast, þá sjá vísindamennirnir ekki annað en að þróunin verði bara í eina átt hvað þetta varðar.
Andrea Marinoni, einn höfunda rannsóknarinnar, sagði að miðað við þann vöxt, sem reiknað er með varðandi gagnaver, muni áhrifin verða mjög mikil fyrir umhverfið, velferð fólks og efnahagslífið.
Hann sagði að hnattræna hlýnun, sem hefur verið gerð góð skil í fjölda rannsókna, sé einnig vandamál sem ekki verði leyst í náinni framtíð.
En það eru ekki allir sérfræðingar jafn áhyggjufullir og höfundar rannsóknarinnar. Ralph Hintemann, hjá Borderstep Institute, sagði í samtali við CNN að hvað varðar loftslagsbreytingarnar, þá sé sú losun sem á sér stað við framleiðslu rafmagns fyrir gagnaver, enn það sem veki mestar áhyggjur.
Önnur rannsókn, sem var birt fyrr á árinu, sýnir að losun á CO₂, í tengslum við starfsemi gervigreindargagnavera, út í andrúmsloftið sé meiri á einu ári en losunin í sumum af stærstu borgum heims. Finansforbundet skýrir frá þessu.
Í rannsókninni kemur fram að losunin vegna gagnaveranna á CO₂ hafi verið á milli 32,6 og 79,7 milljónir tonna á síðasta ári. Losunin í New York var 52,2 milljónir tonna 2023.
Þess utan þarf gervigreind mikið vatn til kælingar og rafmagnsframleiðslu og er það mat eins höfunda rannsóknarinnar að sú notkun sé jafn mikil og öll neysla jarðarbúa á vatni í flöskum.
